کاروبار

ٹیگ

غیروں کی محتاج مگر سرکار یہاں

ماجد صدیقی ۔ غزل نمبر 81

گھر گھر رسماً زر کے ہیں انبار یہاں

غیروں کی محتاج مگر سرکار یہاں

رکھیں گرم فقط جیبیں کارندوں کی

ٹیکس بچائیں کیا کیا ٹیکس گزار یہاں

نرخ بڑھائیں وزن کریں کم چیزوں کے

ہوتا ہے یوں دُگنا کاروبار یہاں

بندشِ آب و ضیا پر ہر سو ہنگامے

سانس تلک لینا بھی ہوا دشوار یہاں

نسل بڑھائیں پودا اک بھی لگا نہ سکیں

بس اِک حد تک ہیں سارے ہُشیار یہاں

وہ جو ملا تھا وہ تو گنوا بیٹھے ہیں ہم

اُس سا ملے اب، کب دُرّ شہوار یہاں

ماجد جو بھی کہے کچھ کہہ دے سوتے میں

تجھ سی بہم کس کو چشمِ بیدار یہاں

ماجد صدیقی

جون 3, 2013 0

پڑے گا تا عُمر اَب یہی کاروبار کرنا

ماجد صدیقی ۔ غزل نمبر 55

شجر سے گرتا ہر ایک پتّا شمار کرنا

پڑے گا تا عُمر اَب یہی کاروبار کرنا

قفس سے جاتی ہوئی ہواؤ، ستمگروں پر

ہماری حالت کُچھ اور بھی آشکار کرنا

یہی تأمّل کا درس ہے اُس کی کامرانی

عقاب سیکھے فضا میں رُک رُک کے وار کرنا

بنامِ خوبی جو ہم سے منسوب ہے، وفا کا

یہ دشت بھی ہے ہمیں اکیلے ہی پار کرنا

ہیں اِس پہ پہلے ہی کتنے احسان مُحسنوں کے

نظر کو ایسے میں اور کیا زیر بار کرنا

طلب اِسی زندگی میں جنّت کی ہے تو ماجدؔ

نہ خبط اعصاب پر کوئی بھی سوار کرنا

ماجد صدیقی

جون 2, 2010 0

مُنہ زور کو شکار کوئی دوسرا کرے

ماجد صدیقی ۔ غزل نمبر 50

سب منتظر ہیں وار کوئی دوسرا کرے

مُنہ زور کو شکار کوئی دوسرا کرے

وحشت ملے نہ اُس کی کبھی دیکھنے کو بھی

آنکھیں بھی اُس سے چار کوئی دوسرا کرے

ہر شخص چاہتا ہے اُسے ہو سزائے جرم

پر اُس کو سنگسار کوئی دوسرا کرے

ہاتھوں میں ہو کمان مگر تیر انتقام

اُس کے جِگر کے پار کوئی دوسرا کرے

ہو اُس کا جور ختم، سبھی چاہتے ہیں پر

یہ راہ اختیار کوئی دوسرا کرے

اعداد سب کے پاس ہیں لیکن مُصر ہیں سب

اُس کے ستم شمار کوئی دوسرا کرے

موزوں نہیں ہیں مدحِ ستم کو کچھ ایسے ہم

ماجدؔ یہ کاروبار کوئی دوسرا کرے

ماجد صدیقی

جون 1, 2003 0

اِتنا اوچھا بھی مجھ پہ وار نہ کر

ماجد صدیقی ۔ غزل نمبر 5

اپنے اِحساں جتا کے خوار نہ کر

اِتنا اوچھا بھی مجھ پہ وار نہ کر

ظلمتوں میں مجھ ایسے ذرّوں کے

جگمگانے کا انتظار نہ کر

مَیں کہ ہوں راندۂ ازل، مجھ پر

کر مگر اتنا اعتبار نہ کر

تو خُدا ہے، تو اپنے بندوں سا

لینے دینے کا کاروبار نہ کر

تُو کہ ابرِ کرم ہے، ربط کرم

چوٹیوں ہی سے استوار نہ کر

لے حقیقت کی کچھ خبر ماجدؔ

واہمے، ذہن پر سوار نہ کر

ماجد صدیقی

جون 1, 2003 0

WordPress.com پر بلاگ.

Up ↑

ماجد صدیقی

شاعرِ بے مثال ماجد صدیقی مرحوم ۔ شخصیت اور شاعری

ٹیگ

کاروبار

غیروں کی محتاج مگر سرکار یہاں

پڑے گا تا عُمر اَب یہی کاروبار کرنا

مُنہ زور کو شکار کوئی دوسرا کرے

اِتنا اوچھا بھی مجھ پہ وار نہ کر

شاعری