چکھا

رُوح میں تُجھ کو سمایا دیکھوں

ماجد صدیقی ۔ غزل نمبر 11

تن بدن لُطف سے نِکھرا دیکھوں

رُوح میں تُجھ کو سمایا دیکھوں

اشک در اشک ہوں عنواں تیرے

آئنوں میں تجھے اُترا دیکھوں

فیصلہ یہ بھی سُنا دے مجھ کو

مَیں ٹھہر جاؤں کہ رستہ دیکھوں

دیکھ کر چاند اُفق پر اُبھرا

تُجھ کو دیکھوں ترا ماتھا دیکھوں

ہاتھ پر لمس کی تحریر تری

ان لبوں سے تُجھے چکھا دیکھوں

کیسا موسم ہے یہ دِل پر ماجدؔ

تہ بہ تہ رنگ یہ کیا کیا دیکھوں

ماجد صدیقی

ماجد صدیقی ۔ غزل نمبر 64

نہ سہی چاند پہ منہ اپنے پہ تُھوکا جائے

دل کا یہ زہر کسی طور تو اگلا جائے

تُو نہیں ہے تو تری سمت سے آنے والی

کیوں نہ اِن شوخ ہواؤں ہی سے لپٹا جائے

بے نیازی یہ کہیں عجز نہ ٹھہرے اپنا

اُس جُھکی شاخ سے پھل کوئی تو چکھا جائے

بے گُل و برگ سی وہ شاخِ تمّنا ہی سہی

دل کے اِس صحن میں ہاں کچھ تو سجایا جائے

چونک اُٹّھے وہ شہنشاہِ تغزّل ماجدؔ

یہ سخن تیرا جو غالبؔ کو سُنایا جائے

ماجد صدیقی