عتاب

ٹیگ

کچھ اس طلب میں خسارے کا بھی حساب کریں

ماجد صدیقی ۔ غزل نمبر 102

یونہی نہ ہم بھی تمنّائے لعلِ نابِ کریں

کچھ اس طلب میں خسارے کا بھی حساب کریں

تنے بھی خیر سے زد میں اِسی ہوا کی ہیں

شکست شاخ سے اندازۂ عتاب کریں

لکھے ہیں شعر تو چھپوا کے بیچئے بھی انہیں

یہ کاروبار بھی اب خیر سے جناب کریں

بدل گیا ہے جو مفہوم ہی مروّت کا

تو کیوں نہ ایسی برائی سے اجتناب کریں

ٹھہر سکیں تو ٹھہر جائیں اب کہیں ماجدؔ

ہمِیں نہ پیروئِ جنبشِ حباب کریں

ماجد صدیقی

جون 3, 2012 0

مرے خدا یہ مجھی پر عتاب سا کیا ہے

ماجد صدیقی ۔ غزل نمبر 101

یہ روز و شب مرے سر ہی عذاب سا کیا ہے

مرے خدا یہ مجھی پر عتاب سا کیا ہے

یہی متاع‘ یہی آرزو ہے دان ترا

یہ میری سطح پہ پھٹتا حباب سا کیا ہے

کہوں نہ کیوں ترے منہ پر جو مجھ پہ گزرے ہے

مجھے یہ باک سا تجھ سے حجاب سا کیا ہے

ہوئی نہ سیر کہیں بھی مری عمق نظری

مری نظر سے گزرتا یہ خواب سا کیا ہے

ملا ہے جو بھی رُتوں سے، پڑے گا لوٹانا

نمو طلب تھے تو اب سے پیچ و تاب سا کیا ہے

قرارِ جاں ہے تو ماجدؔ اُسے تلاش بھی کر

حصولِ یار سے یہ اجتناب سا کیا ہے

ماجد صدیقی

جون 3, 2012 0

ہوئی ہے مدّت ہی ہاتھ میں وہ کتاب آئے

ماجد صدیقی ۔ غزل نمبر 83

وُہ رُوئے روشن، وُہ حسن کا انتخاب آئے

ہوئی ہے مدّت ہی ہاتھ میں وہ کتاب آئے

سوال جو بھی کرو گے اس گنبدِ فلک میں

تمہارا اپنا کہا ہی بن کر جواب آئے

وُہ گل بہ شاخِ نظر ہو یا آس کا ثمر ہو

جِسے بھی آنا ہے پاس اپنے شتاب آئے

کھِنچا کھنچا سا لگے وُہ سانسوں میں بسنے والا

برس ہوئے ہیں ہمِیں پہ اِک یہ عتاب آئے

جھُلانے آئیں نہ رات کی رانیوں سی نیندیں

نہ لوریوں کو کہیں کوئی ماہتاب آئے

فلک سے اُتری ہے برق کب بُوند بُوند ماجدؔ

زدستِ انساں ہی خاک پر ہر عذاب آئے

ماجد صدیقی

جون 2, 2010 0

کمیاب ہے لعلِ ناب سا وُہ

ماجد صدیقی ۔ غزل نمبر 26

سر سے تا پا حجاب سا وُہ

کمیاب ہے لعلِ ناب سا وُہ

اُبھرے بھی جو سطحِ آرزُو پر

رُوکے نہ رُکے حباب سا وُہ

خوشبُو سا خیال میں دَر آئے

آنکھوں میں بسے گلاب سا وُہ

سب تلخ حقیقتوں پہ حاوی

رہتا ہے نظر میں خواب سا وُہ

حاصل ہے سرشکِ لالہ رُو کا

محجوب سا‘ دُرِّ آب سا وُہ

چھایا ہے بہ لُطف ہر ادا سے

خواہش پہ مری نقاب سا وُہ

ہُوں جیسے، اُسی کے دم سے قائم

تھامے ہے مجھے طناب سا وُہ

بارانِ کرم مرے لئے ہے

غیروں کے لئے عتاب سا وُہ

ماجدؔ ہو یہ جسُتجو مُبارک

ہاتھ آ ہی گیا سراب سا وُہ

ماجد صدیقی

جون 1, 2004 0

Create a free website or blog at WordPress.com.

Up ↑

ماجد صدیقی

شاعرِ بے مثال ماجد صدیقی مرحوم ۔ شخصیت اور شاعری

ٹیگ

عتاب

کچھ اس طلب میں خسارے کا بھی حساب کریں

مرے خدا یہ مجھی پر عتاب سا کیا ہے

ہوئی ہے مدّت ہی ہاتھ میں وہ کتاب آئے

کمیاب ہے لعلِ ناب سا وُہ

شاعری