شعار

ٹیگ

وہ نہ مَے سی نگار میں پایا

ماجد صدیقی ۔ غزل نمبر 185

جو مزہ لمسِ یار میں پایا

وہ نہ مَے سی نگار میں پایا

مدّعا پیڑ کے پنپنے کا

پیڑ کے برگ و بار میں پایا

عکسِ وصل و قرابتِ جاناں

موسموں کے نکھارمیں پایا

لطف، صبح و شبانِ ہجراں کا

چشمِ اخترشمار میں پایا

طَور اِک ایک سے الجھنے کا

دیدۂ ہوشیار میں پایا

خوف کیا کیا اِن اپنی آنکھوں نے

اپنے سہمے دیار میں پایا

وصف کِھلنے کا اور مہکنے کا

ماجدِ گل شعار میں پایا

ماجد صدیقی

جون 4, 2013 0

کسی اِک بدن پہ، اِک سا، اگر اختیار ہوتا

ماجد صدیقی ۔ غزل نمبر 160

سفرِ حیات اپنا بڑا لطف دار ہوتا

کسی اِک بدن پہ، اِک سا، اگر اختیار ہوتا

نہ حکومتی سلیقے ہمیں آ سکے دگرنہ

یہ جو اب ہے ایسا ویسا، نہ کوئی دیار ہوتا

نہ کجی کوئی بھی ہوتی کسی فرد کے چلن میں

جسے راستی کہیں سب، وہ اگر شعار ہوتا

کبھی گھٹ کے ہم بھی بڑھتے تو بجا ہے یہ ہمیں بھی

کسی چودھویں کے چندا سا بہم نکھار ہوتا

نہ ہُوا کہ ہم بھی کرتے بڑی زرنگاریاں، گر

زرِ گُل سا پاس اپنے زرِ مستعار ہوتا

کبھی رہنما ہمارا نہ بنا یہ قولِ غالب

’اگر اور جیتے رہتے یہی انتظار ہوتا،

کوئی ہے کمی جو ماجد ہے ہمیں میں ورنہ اپنا

وہ جو ہیں جہاں میں اچّھے، اُنہی میں شمار ہوتا

ماجد صدیقی

جون 4, 2013 0

جویا صحافتی ہیں زرِ بے شمار کے

ماجد صدیقی ۔ غزل نمبر 117

آیت بھی چھاپتے ہیں تو ساتھ اشتہار کے

جویا صحافتی ہیں زرِ بے شمار کے

بندوں پہ بندگان کو اپنے خدائی دے

احسان کیا سے کیا نہیں پروردگار کے

ٹھہرائیں ہم رقیب کسے اور کسے نہیں

ہم یار بھی ہوئے تو جہاں بھر کے یار کے

یہ بھی نجانے کیوں مرے دامن میں رہ گئیں

یہ پتّیاں کہ نقش ہیں گزری بہار کے

سیراب بھی کرے ہے پہ کاٹے بہت زمیں

فیضان دیکھنا شہ دریا شعار کے

گنوائیں کیا سے کیا جو مبلّغ ہیں خیر کے

ہائے وہ سلسلے کہ جو ہیں گیر و دار کے

اس نے تو کھال تک ہے ہماری اتار لی

زیر نگیں ہم آپ ہیں کس تاجدار کے

ہاں آ کے بیٹھتے ہیں کبوتر جو بام پر

ہاں اقربا ہیں یہ بھی مرے دور پار کے

بدلے میں ان کے کرنا پڑے جانے کیا سے کیا

یہ زندگی کے دن کہ ہیں یکسر ادھار کے

ماجد ترا سخن بھی سکوں رہرووں کو دے

گن تجھ میں بھی تو ہیں شجر سایہ دار کے

ماجد صدیقی

جون 3, 2013 0

وہ بھی تو سر ہے ہمارے سحر و شام سوار

ماجد صدیقی ۔ غزل نمبر 39

غیر محسوس ہے جو چوٹ، سدا کا آزار

وہ بھی تو سر ہے ہمارے سحر و شام سوار

بیچ آبادیوں کے روز کچل دیں کیا کیا

وہ کہ ہاتھوں میں کسی کے بھی نہیں جن کی مہار

وہ کہ خونخوار نہ لائیں جسے خاطر میں کبھی

سب سے کمزور اگر ہے تو شرافت کا شعار

ہم نے وہ گرد کہ پھانکی ہے جو ابتک صاحب!

دل سے نکلے بھی تو کس طرح بھلا اُس کا غُبار

بند سکرین جو ٹی وی کی کریں تو اٹکیں

اپنی آنکھوں میں مناظر وہ، نہیں جن کا شمار

پرسکوں رُخ ہے کوئی، قلب نہ شفّاف کوئی

جانے سجتا ہے کہاں اپنی فضاؤں کا نکھار

کاش ہم اُن کے بھی ماجد کبھی قائل ہوتے

وہ کہ دولتّیاں جھاڑیں جو بہ صد عزّو وقار

ماجد صدیقی

جون 3, 2013 0

ہاں مِلے گر تو یوں وقار مِلے

ماجد صدیقی ۔ غزل نمبر 20

شیر کی کھال مستعار مِلے

ہاں مِلے گر تو یوں وقار مِلے

تھے وہ درباریوں کے چھوڑے ہوئے

جو پرندے پئے شکار مِلے

ڑُخ بہ رُخ چاہے گردِ جَور سجے

تخت کو اور بھی نکھار ملے

جو بھی ہے دردمندِ خلق اُس کو

اور کیا جُز فرازِ دار مِلے

جو خلافِ فرعون اُٹّھی تھی

لب بہ لب کیوں وہی پُکار مِلے

کاسہ لیسوں میں اک سے اک تازہ

جو ملے وہ وفا شعار مِلے

وہ جو لائے بقائے حفظِ عوام

کون ماجِد کو ایسا یار مِلے

ماجد صدیقی

جون 2, 2011 0

WordPress.com پر بلاگ.

Up ↑

ماجد صدیقی

شاعرِ بے مثال ماجد صدیقی مرحوم ۔ شخصیت اور شاعری

ٹیگ

شعار

وہ نہ مَے سی نگار میں پایا

کسی اِک بدن پہ، اِک سا، اگر اختیار ہوتا

جویا صحافتی ہیں زرِ بے شمار کے

وہ بھی تو سر ہے ہمارے سحر و شام سوار

ہاں مِلے گر تو یوں وقار مِلے

شاعری