رہتا

نگہت و نُور کے سانچوں میں، نِت ڈھلتا ہوں

ماجد صدیقی ۔ غزل نمبر 18

پھولوں سا کھلتا ہوں دیپ سا جلتا ہوں

نگہت و نُور کے سانچوں میں، نِت ڈھلتا ہوں

پت جھڑ سے پِٹ جانے والی بیلوں کے

دیواروں پر نقش بناتا رہتا ہوں

کھیل کھیل میں، ناؤ بنا کر کاغذ کی

پانی کی فطرت پہچانا کرتا ہوں

تنہائی سے اپنا بَیر چُکانے کو

چڑیا جیسا، آئینے سے لڑتا ہوں

ہاتھ میں نادانوں کے، ڈور سے بندھ کر مَیں

کیا کیا اُڑتا، کیا کیا نوچا جاتا ہوں

ماجد صدیقی

ماجد صدیقی ۔ غزل نمبر 53

لو مَیں بھی ہر بات تمہی سی کہتا ہوں

لو مَیں بھی جذبات کی رَو میں کہتا ہوں

مجھ میں بھی ہے ایک سقم آئنوں سا

جو کچھ ہو محسوس وہی کچھ کہتا ہوں

سچ پوچھو تو پستی کا سر کرنا کیا

دریا بھی ہوں تو اُلٹے رُخ بہتا ہوں

ہوں محروم اِک ایک چلن سے دُنیا کے

ماجدؔ جانے میں کس جگ میں رہتا ہوں

ماجد صدیقی