دیار

وہ نہ مَے سی نگار میں پایا

ماجد صدیقی ۔ غزل نمبر 185

جو مزہ لمسِ یار میں پایا

وہ نہ مَے سی نگار میں پایا

مدّعا پیڑ کے پنپنے کا

پیڑ کے برگ و بار میں پایا

عکسِ وصل و قرابتِ جاناں

موسموں کے نکھارمیں پایا

لطف، صبح و شبانِ ہجراں کا

چشمِ اخترشمار میں پایا

طَور اِک ایک سے الجھنے کا

دیدۂ ہوشیار میں پایا

خوف کیا کیا اِن اپنی آنکھوں نے

اپنے سہمے دیار میں پایا

وصف کِھلنے کا اور مہکنے کا

ماجدِ گل شعار میں پایا

ماجد صدیقی

جون 4, 2013 0

ماجد صدیقی ۔ غزل نمبر 160

سفرِ حیات اپنا بڑا لطف دار ہوتا

کسی اِک بدن پہ، اِک سا، اگر اختیار ہوتا

نہ حکومتی سلیقے ہمیں آ سکے دگرنہ

یہ جو اب ہے ایسا ویسا، نہ کوئی دیار ہوتا

نہ کجی کوئی بھی ہوتی کسی فرد کے چلن میں

جسے راستی کہیں سب، وہ اگر شعار ہوتا

کبھی گھٹ کے ہم بھی بڑھتے تو بجا ہے یہ ہمیں بھی

کسی چودھویں کے چندا سا بہم نکھار ہوتا

نہ ہُوا کہ ہم بھی کرتے بڑی زرنگاریاں، گر

زرِ گُل سا پاس اپنے زرِ مستعار ہوتا

کبھی رہنما ہمارا نہ بنا یہ قولِ غالب

’اگر اور جیتے رہتے یہی انتظار ہوتا،

کوئی ہے کمی جو ماجد ہے ہمیں میں ورنہ اپنا

وہ جو ہیں جہاں میں اچّھے، اُنہی میں شمار ہوتا

ماجد صدیقی

مثالِ قوسِ قزح ہے یہ پیار کا موسم

ماجد صدیقی ۔ غزل نمبر 158

بہم رہے نہ سدا قُربِ یار کا موسم

مثالِ قوسِ قزح ہے یہ پیار کا موسم

نشہ حیات کا سارا اُسی میں پنہاں تھا

کسی بدن پہ جو تھا اختیار کا موسم

نجانے کیوں ہے یتیموں کے دیدہ و دل سا

جہاں پہ ہم ہیں اُسی اِک دیار کا موسم

ہے قحطِ آب کہیں، اور قحطِ ضَو ہے کہیں

نگر پہ چھایا ہے کیا شہریار کا موسم

جو چاہیے تھا بہ کاوش بھی وہ نہ ہاتھ آیا

محیطِ عمر ہُوا انتظار کا موسم

اُنہیں بھی فیض ہمیں سا ملا ہے دریا سے

اِدھر ہی جیسا ہے دریا کے پار کا موسم

گزرنا جان سے جن جن کو آ گیا ماجد

نصیب اُنہی کے ہُوا اَوجِ دار کا موسم

نذرفیض

ماجد صدیقی

جون 4, 2013 0

ماجد صدیقی

شاعرِ بے مثال ماجد صدیقی مرحوم ۔ شخصیت اور شاعری

ٹیگ

وہ نہ مَے سی نگار میں پایا

کسی اِک بدن پہ، اِک سا، اگر اختیار ہوتا

مثالِ قوسِ قزح ہے یہ پیار کا موسم

شاعری