خال

ٹیگ

سینت اِن میں آخر تک کے احوال میاں

ماجد صدیقی ۔ غزل نمبر 79

کیمرے اِن دو آنکھوں کے سنبھال میاں

سینت اِن میں آخر تک کے احوال میاں

جھاڑ کے پچھلے پتے نئی بہار منا

خود سے عہد نیا کر سال بہ سال میاں

عقل تری بھی ہے مانند، سیاست کے

جان کے چل اِس حرّافہ کی چال میاں

یہی تو سرِ ورق ہے تیرے ظاہر کا

تازہ رکھ تو اپنی روشن کھال میاں

جیتے دم گر دن ہو جائے سیہ بھی کوئی

اُس کو سمجھ اپنے مکھڑے کا خال میاں

جن میں الجھ کے اپنے آپ پہ حرف آئے

جی میں پال نہ ایسے بھی جنجال میاں

ماجِد!رُو بہ عروج ہے تو، بس یہ دنیا

جسکی اک اک شے ہے رُو بہ زوال میاں

ماجد صدیقی

جون 3, 2013 0

محال تر ہے بہ ہر حال، اندمال مرا

ماجد صدیقی ۔ غزل نمبر 10

فساد و جبر کے چانٹوں سے منہ ہے لال مرا

محال تر ہے بہ ہر حال، اندمال مرا

طویل دوڑ کے ہائے یہ آخری پھیرے

صدی صدی کے برابر ہے سال سال مرا

بہم ہُوا نہ جہاں میں کسی بھی قاروں کو

مرا وہ رخت ہے سرمایۂ خیال مرا

یہ زہر بھی ہے تو تریاق مجھ کو لگتا ہے

دوام دے مجھے اندیشۂ زوال مرا

نہ دسترس میں ہو چالاک صَیدِ مضموں تو

نشانہ چُوک بھی جاتا ہے خال خال مرا

وہ نامراد مجھے بامراد کیا کرتا

یقین میں نہیں بدلا یہ احتمال مرا

مرے کلام میں پنہاں ہے جیسے برقِ خیال

جمال ہی میں ہے ماجِد چھپا جلال مرا

ماجد صدیقی

جون 3, 2013 0

میانِ قامت و رُخ جُوں سجے ہیں گال ترے

ماجد صدیقی ۔ غزل نمبر 1

افق پہ ذہن کے موزوں ہیں یُوں خیال ترے

میانِ قامت و رُخ جُوں سجے ہیں گال ترے

یہ دشتِ دید ترستا ہے کیوں نظر کو تری

بہ قیدِ چشم ہیں کیوں کر ابھی غزال ترے

گمان‘ برگ و ثمر پر ترا ہی صبح و مسا

خطوطِ حُسن ہویدا ہیں‘ ڈال ڈال ترے

ہرا بھرا ترے دم سے ہے گُلستانِ خیال

بہ کشتِ یاد فسانے ہیں چھال چھال ترے

اُسی سے رقص میں ہے شاخِ آرزوئے وصال

ہیں جس ہوا سے شگفتہ یہ ماہ و سال ترے

نکلنے دیں گے کہاں حلقۂ ضیا سے مُجھے

سحر نما یہ کرشمے ترے، خیال ترے

کبھی یہ شعر بھی ماجدؔ کے دیکھنا تو سہی

نقوش اِن میں بھی اُترے ہیں خال خال ترے

ماجد صدیقی

جون 1, 2004 0

یُوں تو ہو گا یہ جی کچھ اور نڈھال

ماجد صدیقی ۔ غزل نمبر 75

ہو نہ محتاجِ پرسشِ احوال

یُوں تو ہو گا یہ جی کچھ اور نڈھال

وہ ترا بام ہو کہ ہو سرِ دار

پستیوں سے مجھے کہیں تو اُچھال

گُل بہ آغوش ہیں مرے ہی لیے

یہ شب و روز یہ حسیں مہ و سال

دن ترے پیار کا اُجالا ہے

شب ترے عارضوں کا مدّھم خال

مَیں مقّید ہوں اپنی سوچوں کا

بُن لیا مَیں نے شش جہت اِک جال

بے رُخی کی تو آپ ہی نے کی

آپ سے کچھ نہ تھا ہمیں تو ملال

ہے اسی میں تری شفا ماجدؔ

لکھ غزل اور اِسے گلے میں ڈال

ماجد صدیقی

جون 1, 2001 0

Create a free website or blog at WordPress.com.

Up ↑

ماجد صدیقی

شاعرِ بے مثال ماجد صدیقی مرحوم ۔ شخصیت اور شاعری

ٹیگ

خال

سینت اِن میں آخر تک کے احوال میاں

محال تر ہے بہ ہر حال، اندمال مرا

میانِ قامت و رُخ جُوں سجے ہیں گال ترے

یُوں تو ہو گا یہ جی کچھ اور نڈھال

شاعری