تلاش

ماجد صدیقی

شاعرِ بے مثال ماجد صدیقی مرحوم ۔ شخصیت اور شاعری

ٹیگ

یاراں

کدے نہ آئے، جیوندے جاگدے، نامے دل دیاں یاراں دے

ماجد صدیقی (پنجابی کلام) ۔ غزل نمبر 66
سُکے ورقے سُٹ جاندا اے، ڈاکیہ نت اخباراں دے
کدے نہ آئے، جیوندے جاگدے، نامے دل دیاں یاراں دے
اپنے دل توں اوہدے دل تک، پینڈا بوہت لمیرا اے
کہندے نیں سڑ جانداے ایتھے،جگرے شہ اسواراں دے
اوہدے انگ سلامت، پہلی وار جدوں میں چھوہے سن
پیراں ہیٹھاں چِتھدے دِسّے، پھُل جیویں گلزاراں دے
سڑکاں اتوں بھرے بھرا تے، مکھڑے اُڈ اُڈ لنگھدے نیں
دل وچ پہّیے لہہ جاندے نیں، پِیلیاں چٹیاں کاراں دے
چپ دے اجڑے جنگل وچ، جد بول ترے لہراوندے نیں
چھڑ جاندے نیں قّصے ماجدُ ساون دیاں پھوہاراں دے
ماجد صدیقی (پنجابی کلام)

چڑھیا دن نئیں ڈھلدا، کیکن رات ڈھلے بِن یاراں

ماجد صدیقی (پنجابی کلام) ۔ غزل نمبر 52
دیہوں اسمانی ٹھیڈے کھاندا، من وچ روگ ہزاراں
چڑھیا دن نئیں ڈھلدا، کیکن رات ڈھلے بِن یاراں
ترنجناں بن گئے، عمراں دے ویہڑے، اِنج وی ہونا سی
پُونیاں بنیاں، دُکھ ایس دل دے، چرخے پان گھکاراں
اک دل اوہ وی، درد رنجاناں، کس بازی تے لائیے
اساں جیہیاں بندیاں دیاں ایتھے، کیہ جتاں کیہ ہاراں
تیریاں ہوندیاں تے ایہہ گھر دی، حالت کدے نہ ویکھی
یا نظراں نئیں اپنی تھاں تے، یاپیاں کمّن دواراں
کل ائی ایہناں پھُل ورگی، تصویراں نے دَبھ جمسی
کول بہار کے تینوں اج میں، کیہڑے نقش اُتاراں
اکھیاں ول اِنج مڑدے دِسّن، اکھیوں وچھڑے اتھرو
دَکھنوں اُتر پرت پیاں نیں، جنج کونجاں دیاں ڈاراں
سُک گئے بوٹے آساں والے، سجن جدوں دے ٹُر گئے
سچ کہندے نیں لوکی ماجدُ، یاراں نال بہاراں
ماجد صدیقی (پنجابی کلام)

WordPress.com پر بلاگ.

Up ↑