پر – ماجد صدیقی

ہم کس کج نظمی کی، پیہم زد پر ہیں

ماجد صدیقی ۔ غزل نمبر 202

جگہ جگہ آنکھوں میں چُبھتے منظر ہیں

ہم کس کج نظمی کی، پیہم زد پر ہیں

گُن جتلاتے ہیں کیوں ہم، آقاؤں سے

ہم جو حلقہ بگوشی ہی کے خُوگر ہیں

خودی کمائی ہے کیا؟چھینا جھپٹی سے

اوج نشینوں نے، جو سارے خود سر ہیں

عدل گہوں پر بھی ہے گماں زندانوں کا

عادل تک بھی جہاں کے اسیرانِ زر ہیں

نرخوں اور رویّوں تک میں دہشت کے

چُھپے ہُوئے کیا کیا پُھنکارتے اژدر ہیں

کب سے چِھنی ہے اِن سے جانے خوش خُلقی

شہر شہر کیونکر اُجڑے، بستے گھر ہیں

کانوں میں تو گُونج صدائے فلاح کی ہے

حال ہمارے ہی ماجد کیوں ابتر ہیں

ماجد صدیقی

جون 4, 2013 0

بِیج کو وقت ہے درکار شجر ہونے تک

ماجد صدیقی ۔ غزل نمبر 191

اہلِ دل اہلِ نظر اہلِ ہُنر ہونے تک

بِیج کو وقت ہے درکار شجر ہونے تک

پوچھنا چاہو تو اربابِ طرب سے پوچھو

کیا سے کیا چاہیے سُرخاب کا پر ہونے تک

معتقد قیس کے فرہاد کے ہوکر دیکھو

اپنے قدموں میں سجنوا کا نگر ہونے تک

سینہ زوری کوئی برتے کوئی سٹہ بازی

کیا سے کیا منزلیں ہیں صاحبِ زر ہونے تک

یہ تو شاہین ہی جانیں کہ ہے کب تک ممکن

فاختاؤں کا سفر لقمۂ تر ہونے تک

قربِ جاناں کا ہے محدود میّسر آنا

دل کے جل اُٹھنے تلک، آنکھ کے تر ہونے تک

یہ تو ماجد ہی بتائے گا ہے کتنی کتنی

موت سے دست و گریبانی اَمَرہونے تک

ماجد صدیقی

جون 4, 2013 0

لگے ہے جیسے کسی شاہ پر کودیکھا ہے

ماجد صدیقی ۔ غزل نمبر 138

قلم کو دیکھا ہے رختِ ہنر کو دیکھا ہے

لگے ہے جیسے کسی شاہ پر کودیکھا ہے

وہ جس سے سے لمس و قرابت کے ہیں مزے منسوب

بڑی کریدس سے، ہاں اُس شجرکودیکھا ہے

کسی کے دم سے جہاں رونقیں تھیں رقص کناں

بہت اداس بھی پھر اس نگر کودیکھا ہے

شکار ملنے پہ جو سرفراز لگتا تھا

خفیف رُو بھی اسی شیرِ نر کودیکھا ہے

دلوں کے تاج شب و روز ہیں بہم جس کو

بڑے ہیء ٹھاٹھ میں اُس تاجور کودیکھا ہے

وہ جس کی نِت کی دِہاڑی پہ ہو گزر ماجد

کب اُس غریب نے انبارِ زرکودیکھا ہے

ماجد صدیقی

جون 4, 2013 0

آنکھ میں مچلی نظر کا لطف لے

ماجد صدیقی ۔ غزل نمبر 127

سانس کے پل پل سفر کا لطف لے

آنکھ میں مچلی نظر کا لطف لے

ساتھ لاتا ہے جو پیاروں کا ملاپ

انگناں انگناں اُس سحر کا لطف لے

اوس سے بھیگے جو وصلِ یار کے

پھول جیسے اُس پہر کا لطف لے

کربِ خلقت کے سبب بڑھتا ہے جو

تن میں اُس سوزِ جگر کا لطف لے

وہ کہ جو اظہارِ خوبی پر ملے

جی کہے تو ایسی زر کا لطف لے

جب مخالف ہو ہوائے دہر تو

سنسناتے بال و پر کا لطف لے

ہاں عطا ہے سب سے ہٹ کر جو تجھے

تُو بھی ماجد اُس ہنر کا لطف لے

ماجد صدیقی

جون 3, 2013 0

جنت ہی کا نمونہ ٹھہرے اپنا گھر بھی

ماجد صدیقی ۔ غزل نمبر 110

پھول مرے انگناں میں بھی ہیں ہونٹوں پربھی

جنت ہی کا نمونہ ٹھہرے اپنا گھر بھی

موسم ہی ہے پالنے والا ہمیں پھہاروں

موسم ہی کرنے والا ہے زیر و زبر بھی

کیسے فرشتہ ٹھہرے، اور شیطان ہو کیسے؟

انساں ہی میں خیرہے انساں ہی میں شر بھی

گھر سے نکل کے گھر لوٹ آنا مشکل لاگے

کنواں بنی ہے موت کا اک اک راہگزر بھی

کھلی فضاؤں میں بھی اُڑانیں ہیں آزردہ

موم لگے لگتے ہیں اپنے بال و پر بھی

پاس ہوں یہ تو آدمی سونا ورنہ مٹی

ماجد جی کیا چیزیں ہیں یہ سیم و زر بھی

ماجد صدیقی

جون 3, 2013 0

زمیں پہ برق کے زورِ ہنر کو دیکھتے ہیں

ماجد صدیقی ۔ غزل نمبر 95

وہ جس پہ کوند گئی اس شجر کو دیکھتے ہیں

زمیں پہ برق کے زورِ ہنر کو دیکھتے ہیں

کوئی تو رُخ ہے نہاں جمگھٹے میں زلفوں کے

سیاہ رات کے انگناں سحر کو دیکھتے ہیں

پیامِ یار پہ پیہم لگے ہیں گوش و نگاہ

کبوتروں کے کُھلے بال و پر کو دیکھتے ہیں

عقاب ٹوٹتے دیکھیں جو فاختاؤں پر

ہم اپنے حق میں روا خیروشر کو دیکھتے ہیں

ہم اس کے روپ میں ملزم جو واگزار ہوا

نجانے کیوں پسِ انصاف، زر کو دیکھتے ہیں

جو پھڑپھڑائے فضا میں بہ شکل شاہ سُرخی

جو رن سے آئےُنامہ بر کو دیکھتے ہیں

کبھی نہ اگلا سفر کر سکیں وہ طے ماجد

مآلِ کار جو رنجِ سفر کو دیکھتے ہیں

ماجد صدیقی

جون 3, 2013 0

جو تیری قرابت میں ہے نشہ وہ اور کسی ساغر میں کہاں

ماجد صدیقی ۔ غزل نمبر 59

آنکھوں سے تری جو ہویدا ہے وہ کیف کسی منظر میں کہاں

جو تیری قرابت میں ہے نشہ وہ اور کسی ساغر میں کہاں

تُو بات کرے توپھول جھڑیں مستی چھلکے تری آنکھوں سے

جو طنطنہ تیرے سخن میں ہے وہ اور کسی کے ہنر میں کہاں

جو باس جلو میں ترے ہے سجن کیا کہنے اُس کی تمازت کے

جو تیری نگاہ میں ہے جاناں! گرمی وہ حصولِ زر میں کہاں

تن من کو جو پل میں جگا ڈالے مائل جو کرے جل مِٹنے پر

جو آنکھ تری میں شرارت ہے، وہ اور کسی بھی شرر میں کہاں

جو ذہن و بدن کو جِلا بخشے، حدّت جو لہو کو دلاتی ہے

جو یاد تری سے ہے وابستہ وہ تازگی رُوئے قمر میں کہاں

قدموں میں جو تاب و تواں اُتری کب جسم میں ایسی توانائی

چلنے میں شرف ہے جو سمت تری وہ اور کسی بھی سفر میں کہاں

جس عمر میں چاہتے ہو کہ بڑھو پھر رفعتِ قاف کی جانب تُم

ایسی بھی توانائی ماجِد! اِس عمر کے بال و پر میں کہاں

ماجد صدیقی

جون 3, 2013 0

یا ذی عقل بھی اپنالے خاصہ خر کا

ماجد صدیقی ۔ غزل نمبر 31

رب نزدیک ہے یا گھونسا زورآور کا

یا ذی عقل بھی اپنالے خاصہ خر کا

باہرکی افواہیں گردش میں ہیں مدام

کوئی نہیں جو حال سنائے اندر کا

لغزش لیسی ہو فردوس بدر کردے

اُس کے بعد تناؤ ہے جیون بھر کا

ملکوں کو چرکے کم کم ہی لگتے ہیں

لگے تو لگے سقوطِ ڈھاکہ سا چرکا

وہ جو شکاری کی تسکین کا ساماں ہے

دھڑکا لگا رہے ہرآن اُسی شر کا

آندھی کس کس سے جانے کیا کیا چھینے

اندیشہ ہے ہمیں تو وہ، بال و پر کا

تُو کہ ہے طُرفہ گو آغاز سے ہی ماجد!

چرچاکیوں نہ ہُوا پھر تجھ سے سخنور کا

ماجد صدیقی

جون 3, 2013 0

یا ذی عقل ہی اپنالے خاصہ خر کا

ماجد صدیقی ۔ غزل نمبر 15

رب نزدیک ہے یا مُکّا زورآور کا

یا ذی عقل ہی اپنالے خاصہ خر کا

باہرکی افواہیں گردش میں ہیں مدام

کوئی نہیں جو حال سنائے اندر کا

لغزش لیسی ہو فردوس بدر کردے

دیکھنا پڑے بکھیڑا پھر جیون بھر کا

ملکوں کو چرکے کم کم ہی لگتے ہیں

لگے تو لگے سقوطِ ڈھاکہ سا چرکا

وہ جو شکاری کی تسکین کا ساماں ہے

دھڑکا لگا رہے ہرآن اُسی شر کا

آندھی کس کس سے جانے کیا کیا چھینے

اندیشہ ہے ہمیں تو وہ، بال و پر کا

تُو کہ ہے طُرفہ گو آغاز سے ہی ماجد!

چرچاکیوں نہ ہُوا پھر تجھ سے سخنور کا

ماجد صدیقی

جون 3, 2013 0

گزر رہی ہے اِسی رات کی سحر کرتے

ماجد صدیقی ۔ غزل نمبر 60

فضائے تار میں تنہا نفس سفر کرتے

گزر رہی ہے اِسی رات کی سحر کرتے

ہے اختلافِ نظر وجہِ خاموشی، ورنہ

ہم اُس کے پیار کا چرچا نگر نگر کرتے

یہ بات قرب کے منصب پہ منحصر تھی ترے

بچا کے رکھتے کہ دامن کو ہم بھی تر کرتے

درِ قفس پہ رُتیں دستکیں تو دیتی رہیں

ہُوا نہ ہم سے کہ ہم فکرِ بال و پر کرتے

جو تو نہیں تھا تو جل جل کے خود ہی بجھتے رہے

ہم اور نذر کسے شعلۂ نظر کرتے

تری نظر کا اشارہ نہ مل سکا، ورنہ

وہ اوج کون سا تھا ہم جسے نہ سر کرتے

ابھی تلک تو نہ مخدوم ہم ہوئے ماجدؔ

اگرچہ عُمر ہوئی خدمتِ ہنر کرتے

ماجد صدیقی

جون 3, 2012 0

تِیر برسے ہمیں پر بھرے شہر میں

ماجد صدیقی ۔ غزل نمبر 20

تھے ہمیں غم کے خوگر بھرے شہر میں

تِیر برسے ہمیں پر بھرے شہر میں

پھر زدستِ ہوس ہے سبک ہو چلا

جُھک گیا پھر کوئی سر بھرے شہر میں

کوئی آذر تو ہو گا ہمارے لئے

ہم کہ ٹھہرے ہیں پتّھر بھرے شہر میں

کس بھیانک خبر کا اثر مجھ پہ تھا

میں ہی تھا جیسے ششدر بھرے شہر میں

خوف کچھ دستکوں سے بڑھا اور بھی

کھُلنے پایا نہ اِک در بھرے شہر میں

کیا غضب ہے ترستا ہے پہچان کو

تجھ سا ماجدؔ سخن وَر بھرے شہر میں

ماجد صدیقی

جون 3, 2012 0

قدم قدم ہے مرا پل صراط پر جیسے

ماجد صدیقی ۔ غزل نمبر 90

ہُوا ہے درپئے جاں اَب تو ہر سفر جیسے

قدم قدم ہے مرا پل صراط پر جیسے

سُجھا رہی ہیں یہی نامرادیاں اپنی

رہیں گے آنکھ میں کنکر یہ عمر بھر جیسے

سفر میں ہُوں پہ وُہ خدشات ہیں کہ لگتا ہے

جھُلس رہا ہو سرِ راہ ہر نگر جیسے

کہیں تو بات بھلا دل کی جا کے کس سے کہیں

بچھڑ کے رہ گئے سارے ہی ہم نظر جیسے

لپک رہا ہوں مسلسل مگر نہ ہاتھ آئے

کٹی پتنگ ہو اُمید کی سحر جیسے

دہن دہن سے زباں جھڑ گئی ہے یُوں ماجدؔ

خزاں کے دور میں بے برگ ہوں شجر جیسے

ماجد صدیقی

جون 2, 2010 0

کس کے ہاتھوں آ لگا مجھ کو یہ پتّھر دیکھنا

ماجد صدیقی ۔ غزل نمبر 65

کون سا الزام آیا ہے مرے سر، دیکھنا

کس کے ہاتھوں آ لگا مجھ کو یہ پتّھر دیکھنا

خستوں نے کس قدر قامت تمہاری پست کی

رازقو! یہ فرق بھی دل میں اُتر کر دیکھنا

کرچیوں کی شکل میں پلکوں تلک جو آ گیا

یہ مرا دل ہے اسے بھی آئنہ گر! دیکھنا

پھُول سا ہر صبح رکھ لینا اُسے پیشِ نظر

چاند سا ہر دم اُسے اپنے برابر دیکھنا

گھونسلوں میں پھیلتی اِک آبشارِ نغمگی

اور پھر زیرِ شجر بکھرے ہوئے پر دیکھنا

حفظِ جاں کے عُذر کے ہوتے نجانے کس طرف

لے گئی انساں کو ماجدؔ، قوتِ شر دیکھنا

ماجد صدیقی

جون 2, 2010 0

ہمیں بھی خبط سا لاحق ہے امیدِ سحر کب ہے

ماجد صدیقی ۔ غزل نمبر 4

افق پر، مہر بننا تھا جسے اَب وُہ شرر، کب ہے

ہمیں بھی خبط سا لاحق ہے امیدِ سحر کب ہے

کبھی ایسا بھی تھا لیکن نہ تھے جب بخت برگشتہ

اِسے دریوزہ گر کہئے، یہ دل اَب تاجور کب ہے

اثر جس کا مرض کی ابتدا تک ہی مسلّم تھا

ملے بھی گر تو وُہ نسخہ بھلا اب کارگر کب ہے

چلے تو ہیں کہ انسانوں کو ہم، ہم مرتبت دیکھیں

مگر جو ختم ہو جائے بھلا یہ وہ سفر کب ہے

علی الاعلان حق میں بولتا ہو جو نحیفوں کے

اُسے مردود کہئیے شہر میں وُہ معتبر کب ہے

قفس کا در کہاں کھُلنے کا ہے لیکن اگر ماجدؔ

کھُلا بھی دیکھ لیں تو اعتبارِ بال و پر کب ہے

ماجد صدیقی

جون 2, 2010 0

میر ے ہونٹوں پہ رقصاں شرر دیکھنا

ماجد صدیقی ۔ غزل نمبر 14

دیکھنا دیکھنا اک نظر دیکھنا

میر ے ہونٹوں پہ رقصاں شرر دیکھنا

میری جانب سے ہے اِک کبوتر اڑا

اُس کی تم منتہائے سفر دیکھنا

دمبدم ہیں رواں جو تمہاری طرف

اور شل ہیں جو، وہ بال و پر دیکھنا

جان لینا اسے تم پیمبر مرا

ایک تارا قریبِ قمر دیکھنا

آنکھ مضطر ہے اور چاہتی ہے کوئی

جسم کی چاندنی کا نگر دیکھنا

ماجد صدیقی

جون 2, 2008 0

چمن سے شور اُٹھا ’’الحذر‘‘ کا

ماجد صدیقی ۔ غزل نمبر 150

ہوا نے یُوں بدن نوچا شجر کا

چمن سے شور اُٹھا ’’الحذر‘‘ کا

اترنا اشک کا نوکِ مژہ پر

سرِ میزان تُلنا ہے گہر کا

ہم ایسوں سے سلوک اُس کا ہے جیسے

تعلق مفلسوں سے اہلِ زر کا

نشیمن ہی نہیں اِک نُچنے والا

لگا ہے اب تو کھٹکا بال و پر کا

ہمیں احوال سن کر کارواں کا

ہُوا ماجدؔ نہ یارا ہی سفر کا

ماجد صدیقی

جون 2, 2007 0

کہ بے قصور نہ بستی میں کوئی گھر دیکھا

ماجد صدیقی ۔ غزل نمبر 143

وہ فردِ جرم کا غلبہ ہے دربہ در دیکھا

کہ بے قصور نہ بستی میں کوئی گھر دیکھا

بدن میں خوف سے پائی سکت نہ جنبش کی

یہ انکسار بھی باوصفِ بال و پر دیکھا

بس اِتنا یاد ہے قصہ گرانیٔ شب کا

کوئی گلاب نہ کِھلتا دم سحر دیکھا

لہو کی آنچ لیے جو بھی تا بہ لب آیا

وہ حرف بعد میں لکھا بہ آبِ زر دیکھا

ہُوا ہو برق کی مانند سامنا جس سے

جدا نہ ذہن سے ہوتا ہوا وہ ڈر دیکھا

چمن کا حال وہ ماجدؔ! کہے گا کیا جس نے

ہر ایک شاخ کے پہلو میں ہو تبر دیکھا

ماجد صدیقی

جون 2, 2007 0

بے برگ شجر دیکھوں بکھرے ہوئے پر دیکھوں

ماجد صدیقی ۔ غزل نمبر 126

منظر سے ذرا ہٹ کر پل بھر جو ادھر دیکھوں

بے برگ شجر دیکھوں بکھرے ہوئے پر دیکھوں

جلتے ہیں، اگر ان کے ٹخنے بھی کوئی چھولے

قامت میں بہت چھوٹے سب اہلِ نظر دیکھوں

لگتا ہے پرندوں سا بکھرا ہوا رزق اپنا

بیٹھوں بھی تو پیروں کو مصروفِ سفر دیکھوں

کس ابر سے نیساں کے آنکھیں ہیں نم آلودہ

کیا کیا ہیں صدف جن میں بے نام گہر دیکھوں

آتا ہے نظر ماجدؔ! کیا کچھ نہ جبینوں پر

ایسے میں بھلا کس کے مَیں قلب و جگر دیکھوں

ماجد صدیقی

جون 2, 2007 0

فلک سے فیض کے طالب ہیں پھر شجر اپنے

ماجد صدیقی ۔ غزل نمبر 120

لُٹا کے حرصِ نمو میں گل و ثمر اپنے

فلک سے فیض کے طالب ہیں پھر شجر اپنے

نظر، خیال، گماں، تشنگی تمّنا کی

نہ آئے لوٹ کے جتنے تھے نامہ بر اپنے

یتیم جیسے جواں ہو کے بھی یتیم رہے

اُسی طرح کے گماں اور وہی ہیں ڈر اپنے

فضا کے دوش سے کس آن پھینک دیں جانے

مسافتوں سے شکستہ یہ بال و پر اپنے

ملا وُہ یار تو دل یوں مچل اُٹھا ماجدؔ

کہ بعدِ عمر مُڑے جیسے کوئی گھر اپنے

ماجد صدیقی

جون 2, 2007 0

اُداس شام مگر ایک ہی کے گھر اُترے

ماجد صدیقی ۔ غزل نمبر 92

سحر تو ایک سی گُرگ و غزال پر اُترے

اُداس شام مگر ایک ہی کے گھر اُترے

سنی پکار نہ آئی صدا سسکنے کی

نجانے کون سی گھاٹی میں ہم سفر اُترے

نکل کے چاند سے کیوں راہ بھول جاتی ہے

وُہ چاندنی کہ جو بیوہ کے بام پر اُترے

انہی پہ سانپ نگلتے ہیں ناتوانوں کو

سفیر بن کے سکوں کے ہیں گو شجر اُترے

مری بھی رُوح کا ساگر ہُوا کرم فرما

مری بھی آنکھ میں دیکھو تو ہیں گہر اُترے

سمیٹ لائے جہاں بھر کے رتجگے ماجدؔ

وہ ذہن جس پہ فلک سے کوئی ہُنر اُترے

ماجد صدیقی

جون 2, 2007 0

بے اماں ہیں مرے نگر کیا کیا

ماجد صدیقی ۔ غزل نمبر 91

سنسناتے ہیں بام و در کیا کیا

بے اماں ہیں مرے نگر کیا کیا

تجھ سے بچھڑے تو دیکھنا یہ ہے

آنکھ اُگلے گی اب گہر کیا کیا

آنچ ہی سے بدلتے موسم کی

سہم جانے لگے شجر کیا کیا

دیکھنے کو مآل خواہش کا

دل کو درپیش ہیں سفر کیا کیا

چہچہوں کے بلند ہوتے ہی

کاگ جھپٹے ہیں شاخ پر کیا کیا

اذن پرواز کو ترستے ہیں

گرد خوردہ یہ بال و پر کیا کیا

ہم سے کہنے میں حالِ دل ماجدؔ

ہچکچاتا ہے نامہ بر کیا کیا

ماجد صدیقی

جون 2, 2007 0

اُس کا پیکر ہے مگر یاد آیا

ماجد صدیقی ۔ غزل نمبر 70

دشت میں رہ کا شجر یاد آیا

اُس کا پیکر ہے مگر یاد آیا

پھر تمّنا نے کیا ہے رُسوا

پھر مسیحاؤں کا در یاد آیا

اُس کی آنکھوں سے لہو تک اُس کے

طے کیا تھا جو سفر یاد آیا

جب بھی بچّہ کوئی مچلا دیکھا

مجھ کو سپنوں کا نگر یاد آیا

ہم کو پنجرے سے نکلنا تھا کہ پھر

برق کو اپنا ہُنر یاد آیا

ابر ڈھونڈوں گا کہاں سر کے لئے

لُطف ماں باپ کا گر یاد آیا

کیا کرم اُس کا تھا ماجدؔ کہ جسے

یاد آنا تھا نہ ، پر یاد آیا

ماجد صدیقی

جون 2, 2007 0

سسکنے لگے پھر شجر دیکھنا

ماجد صدیقی ۔ غزل نمبر 54

جھڑے مثلِ خس، برگ و بر دیکھنا

سسکنے لگے پھر شجر دیکھنا

فضائے مقاصد کی وسعت اُدھر

اِدھر مُشت بھر بال و پر دیکھنا

خراشوں پہ اِس کی بھی کرنا نظر

یہ دل بھی مرے شیشہ گر دیکھنا

یہی آج کا جام جمشید ہے

ذرا جانبِ چشمِ تر دیکھنا

اُبھرنا وہ اس چاند کا اور وہ

بسوئے اُفق رات بھر دیکھنا

شگفتِ نظر جس کا آغاز ہے

یہ موسم کبھی اَوج پر دیکھنا

کہو کیوں جنوں ہے یہ ماجدؔ تمہیں

جِسے دیکھنا باہُنر دیکھنا

ماجد صدیقی

جون 1, 2007 0

ہمیں اُس نے بہ چشمِ تر نہ دیکھا

ماجد صدیقی ۔ غزل نمبر 33

تلاطم بحر کا آ کر نہ دیکھا

ہمیں اُس نے بہ چشمِ تر نہ دیکھا

کسی کے ہجر کا اب ہے جو، ایسا

کوئی بھی مرحلہ دُوبھر نہ دیکھا

ملا جیسے وہ اب کے، جان و دل پر

کھُلا جنّت کا ایسا در نہ دیکھا

نگل لیتا ہے جاں جس آن چاہے

زمانے سا کوئی اژدر نہ دیکھا

کبھی تھے چہچہے جس گھونسلے میں

ہُوا پھر یُوں، وہاں اِک پر نہ دیکھا

گھِرا ہے اَب کے یہ ژالوں میں جیسے

چمن کا حال یوں ابتر نہ دیکھا

خود اُس پر ختم ہے ماجدؔ ہنر یہ

گیا جس سے فنِ آذر نہ دیکھا

ماجد صدیقی

جون 1, 2007 0

مادۂ آتش سے پُر اپنے سمندر دیکھنا

ماجد صدیقی ۔ غزل نمبر 56

دیکھنا ہر سمت سیلِ فتنہ و شر دیکھنا

مادۂ آتش سے پُر اپنے سمندر دیکھنا

پچھلی ساعت کربلاؤں سا ہُوا جو رُو نما

ہے ہمیں سکرین پر گھر میں وہ منظر دیکھنا

اِس سے پہلے تو کوئی بھی ٹڈّی دَل ایسا نہ تھا

اب کے جو پرّاں فضا میں ہیں وہ اخگر دیکھنا

فاختائیں فاختاؤں کو کریں تلقینِ امن

مضحکہ موزوں ہُوا یہ بھی ہمِیں پر دیکھنا

کیا کہیں آنکھوں پہ اپنی جانے کب سے قرض تھا

جسم میں اُترا کم اندیشی کا خنجر دیکھنا

کچھ نہیں جن میں معانی منمناہٹ کے سوا

درس کیا سے کیا ہمیں ماجد ہیں ازبر دیکھنا

جنگِ خلیج کے پس منظر میں

ماجد صدیقی

جون 1, 2006 0

ہاتھ دستِ یزید میں جو نہ دے حق سرائی میں اپنا سر دے دے

ماجد صدیقی ۔ غزل نمبر 13

خلق چاہے اُسے حسین کوئی، وقت با صورتِ دگر دے دے

ہاتھ دستِ یزید میں جو نہ دے حق سرائی میں اپنا سر دے دے

اہلِ حق کو جو فتحِ مکہ دے اے خدا تجھ سے کچھ بعید نہیں

اشک ہیں جس طرح کے آنکھوں میں دامنوں کو وہی گہر دے دے

ہوں بھسم آفتوں کے پرکالے بُوندیوں میں بدل چلیں ژالے

جو بھی واماندگانِ گلشن ہیں رُت انہیں پھر سے بال و پر دے دے

لَوث جس کونہ چھُو کے گزری ہو جس میں خُو خضرِ دستگیر کی ہو

جس کے چہرے پہ لَو ضمیر کی ہو کوئی ایسا بھی رہبر دے دے

ہو مبارک ستم عقابوں کو کرگسوں کو نصیب آز رہے

فاختاؤں کو جو بہم ہے یہاں زندہ رہنے کا وہ ہُنر دے دے

ماجد صدیقی

جون 1, 2006 0

ہم اِک اُسی کی جستجو لئے نگر نگر گئے

ماجد صدیقی ۔ غزل نمبر 39

وُہ جس کے نین نقش اپنے ذہن میں اُتر گئے

ہم اِک اُسی کی جستجو لئے نگر نگر گئے

خیال قُرب اُسی کا سر پہ ابر سا جھُکا رہا

میانِ دشتِ روزگار ہم جدھر جدھر گئے

تھیں اُس کے مُڑ کے دیکھنے میں بھی عجب مسافتیں

حدوں سے شب کی ہم نکل کے جانبِ سحر گئے

دُھلے فلک پہ جس طرح شب سیہ کی چشمکیں

پسِ وصال ہم بھی کچھ اِسی طرح نکھر گئے

اُسی کی دید سے ہمیں تھے حوصلے اُڑان کے

گیا جو وہ تو جانئے کہ اپنے بال و پر گئے

وُہ جن کے چوکھٹوں میں عکس تھے مرے حبیب کے

وُہ ساعتیں کہاں گئیں وہ روز و شب کدھر گئے

ماجد صدیقی

جون 1, 2004 0

مَیں بدن کا ترے کھُلتا ہوا منظر دیکھوں

ماجد صدیقی ۔ غزل نمبر 13

جب بھی دیکھوں یہ فلک، اَبر ہٹا کر دیکھوں

مَیں بدن کا ترے کھُلتا ہوا منظر دیکھوں

گلشنِ حُسن پہ ہو راج اِسی کا جیسے

ان دنوں مرغِ طلب کو وُہ لگے پر دیکھوں

اوج کے لمس سے پہنچوں بہ سرِ چشمۂ لُطف

پر جو اِیدھر سے اُتر پاؤں تو اُودھر دیکھوں

میری حیرت سے کھلے تُجھ پہ ترا حُسن مگر

آئنوں سا میں جبھی تُجھ کو برابر دیکھوں

لب پہ رقصاں ہے مرے، ہے جو پسِ چشم اُدھر

اِس شرارت میں بپا کتنے ہی محشر دیکھوں

بِین سا سامنے جس کے ترا پیکر گونجے

خواب میں بھی ترے آنگن میں وہ اژدر دیکھوں

شعبدہ ہے، کہ تقاضا یہ تری دید کا ہے

ہر بُنِ مُو میں سمائے ہوئے اخگر دیکھوں

اِک لب و چشم تو کیا اِن کے سوا بھی ماجدؔ

جذبۂ شوق کے کیا کیا نہ کھلے در دیکھوں

ماجد صدیقی

جون 1, 2004 0

ہمیں اس نے کبھی ہمسر نہ جانا

ماجد صدیقی ۔ غزل نمبر 49

زرِ گل تھے بھی گر تو زر نہ جانا

ہمیں اس نے کبھی ہمسر نہ جانا

جبیں جس پر جھکائی عرش جیسی

ہمارا مرتبہ وُہ در نہ جانا

گھُلی چیخیں بھی ہیں لقموں میں اُس کے

یہ باریکی کوئی اژدر نہ جانا

سزا کے سارے تیور تھے اُسی میں

ہوا کو ہم نے نامہ بر نہ جانا

ذرا مّکے گیا تو جانے ہم نے

خرِ عیسٰی کو کیونکر خر نہ جانا

نہیں اتنا بھی سادہ لوح ماجدؔ

اُسے جانا ہے تم نے پر نہ جانا

ماجد صدیقی

جون 1, 2003 0

حساب ظالم و مظلوم کا برابر ہے

ماجد صدیقی ۔ غزل نمبر 41

دہن میں نیولے کے دیکھئے گا اژدر ہے

حساب ظالم و مظلوم کا برابر ہے

ندی میں برگ پہ چیونٹی ہے اور اِدھر ہم ہیں

کہ جن کے سامنے آلام کا سمندر ہے

سفر میں صبر کی ناؤ ہمیں جو دی اُس نے

ہمارے واسطے سرخاب کا یہی پَر ہے

چلا نہیں گل و مہتاب کو پتہ اتنا

ہمارے گھر بھی کوئی بام ہے کوئی در ہے

ابد تلک کو جو زیبِ سناں ہوا ماجدؔ

نہیں حسینؑ کا شمر و یزید کا سر ہے

ماجد صدیقی

جون 1, 2003 0

تجھ سے چھینے گئے جو گہر، چھین لے

ماجد صدیقی ۔ غزل نمبر 36

کر کے غاصب کو زیر و زبر چھین لے

تجھ سے چھینے گئے جو گہر، چھین لے

ناز ہو ننّھی چڑیوں کے خوں پر جنہیں

اُن عقابوں سے تُو بال و پر چھین لے

جس کی بنیاد تیرے عرق سے اٹھی

اُس سپھل پیڑ سے برگ و بر چھین لے

نرم خُوئی تلک نرم خُو ہو، مگر

دستِ جارح سے تیغ و تبر چھین لے

حق ملے گا تجھے دشتِ وحشت میں کیا

چھین لے، چھین سکتا ہے گر، چھین لے

جس کا حقدار ہے تو وہ تکریمِ فن

تو بھی اے ماجدِ با ہنر! چھین لے

ماجد صدیقی

جون 1, 2002 0

حبس پہنچا ہے کس اَوج پر دیکھنا

ماجد صدیقی ۔ غزل نمبر 23

سانس روکے کھڑے ہیں شجر دیکھنا

حبس پہنچا ہے کس اَوج پر دیکھنا

خرمنوں میں ہوئیں جن کی بیجائیاں

پھولنے کو ہیں اب وہ شرر دیکھنا

لیس کر کے ہمیں رختِ بارود سے

بھیجتا ہے کدھر؟ رہبر دیکھنا

کھور ہی دے بدن کو نہ آنکھوں کی نم

دیکھنا ماجدِ بے خبر دیکھنا

ماجد صدیقی

جون 1, 2002 0

موت کیسی؟ یہ مرا ڈر نکلا

ماجد صدیقی ۔ غزل نمبر 59

میں ابھی موت سے بچ کر نکلا

موت کیسی؟ یہ مرا ڈر نکلا

اشک تھے سو تو چھُپائے مَیں نے

پھول کالر پہ سجا کر نکلا

مَیں تو ہوں مُہر بلب بھی لیکن

کام کچھ یہ بھی ہے دُوبھر نکلا

یہ الگ بات کہ پیچھا نہ کیا

گھر سے تو اُس کے برابر نکلا

خاک سے جس کا اُٹھایا تھا خمیر

ہم رکابِ مہ و اختر نکلا

مَیں کہ عُریاں نہ ہُوا تھا پہلے

بن کے اُس شوخ کا ہمسر نکلا

غم کی دہلیز نہ چھوڑی میں نے

میں نہ گھر سے کبھی باہر نکلا

جو اُڑاتا مجھے ہم دوشِ صبا

مجھ میں ایسا نہ کوئی پر نکلا

اُس نے بے سود ہی پتھر پھینکے

حوصلہ میرا سمندر نکلا

درد اظہار کو پہنچا ماجدؔ

دل سے جیسے کوئی نشتر نکلا

ماجد صدیقی

جون 1, 2001 0

پھیلتے جا رہے ہیں کھنڈر سامنے

ماجد صدیقی ۔ غزل نمبر 46

کوئی بستی نہ دیوار و در سامنے

پھیلتے جا رہے ہیں کھنڈر سامنے

اپنی جانب لپکتے قدم دیکھ کر

مُسکراتے ہیں گل شاخ پر سامنے

یاد میں تھیں صبا کی سی اٹکھیلیاں

جانے کیا کچھ رہا رات بھر سامنے

زندگی ہے کہ آلام کی گرد سے

ہانپتی ہے کوئی راہگزر سامنے

رات تھی جیسے جنگل کا تنہا سفر

چونک اُٹھے جو دیکھی سحر سامنے

آئنے ہیں مقابل جِدھر دیکھیے

اپنی صورت ہے با چشمِ ترا سامنے

ہم ہیں ماجدؔ سُلگتے دئیے رات کے

بُجھ گئے بھی تو ہو گی سحر سامنے

ماجد صدیقی

جون 1, 2001 0

پھر کیوں نہ ہر قدم پہ نئی راہگزر ملے

ماجد صدیقی ۔ غزل نمبر 15

تو مُدّعا ہو اور ترا غم ہمسفر ملے

پھر کیوں نہ ہر قدم پہ نئی راہگزر ملے

اَب ہم سے مستیاں وہ، طلب کر نہ اے صبا!

مدّت ہوئی کسی کی نظر سے نظر ملے

حُسنِ حبیب اَب لب و رُخسار تک نہیں

اَب تو جنوں بضد ہے کہ حُسنِ نظر ملے

اِک عمر سے گھرے ہیں اِسی بے بسی میں ہم

تجھ تک اُڑان کو نہ مگر بال و پر ملے

مُطرب! بہ رقص گا، مرے ماجدؔ کی یہ غزل

تجھ سے مرا وہ سروِ چراغاں اگر ملے

ماجد صدیقی

جون 1, 2001 0

ماجد صدیقی

شاعرِ بے مثال ماجد صدیقی مرحوم ۔ شخصیت اور شاعری

ٹیگ

پر

ہم کس کج نظمی کی، پیہم زد پر ہیں

بِیج کو وقت ہے درکار شجر ہونے تک

لگے ہے جیسے کسی شاہ پر کودیکھا ہے

آنکھ میں مچلی نظر کا لطف لے

جنت ہی کا نمونہ ٹھہرے اپنا گھر بھی

زمیں پہ برق کے زورِ ہنر کو دیکھتے ہیں

جو تیری قرابت میں ہے نشہ وہ اور کسی ساغر میں کہاں

یا ذی عقل بھی اپنالے خاصہ خر کا

یا ذی عقل ہی اپنالے خاصہ خر کا

گزر رہی ہے اِسی رات کی سحر کرتے

تِیر برسے ہمیں پر بھرے شہر میں

قدم قدم ہے مرا پل صراط پر جیسے

کس کے ہاتھوں آ لگا مجھ کو یہ پتّھر دیکھنا

ہمیں بھی خبط سا لاحق ہے امیدِ سحر کب ہے

میر ے ہونٹوں پہ رقصاں شرر دیکھنا

چمن سے شور اُٹھا ’’الحذر‘‘ کا

کہ بے قصور نہ بستی میں کوئی گھر دیکھا

بے برگ شجر دیکھوں بکھرے ہوئے پر دیکھوں

فلک سے فیض کے طالب ہیں پھر شجر اپنے

اُداس شام مگر ایک ہی کے گھر اُترے

بے اماں ہیں مرے نگر کیا کیا

اُس کا پیکر ہے مگر یاد آیا

سسکنے لگے پھر شجر دیکھنا

ہمیں اُس نے بہ چشمِ تر نہ دیکھا

مادۂ آتش سے پُر اپنے سمندر دیکھنا

ہاتھ دستِ یزید میں جو نہ دے حق سرائی میں اپنا سر دے دے

ہم اِک اُسی کی جستجو لئے نگر نگر گئے

مَیں بدن کا ترے کھُلتا ہوا منظر دیکھوں

ہمیں اس نے کبھی ہمسر نہ جانا

حساب ظالم و مظلوم کا برابر ہے

تجھ سے چھینے گئے جو گہر، چھین لے

حبس پہنچا ہے کس اَوج پر دیکھنا

موت کیسی؟ یہ مرا ڈر نکلا

پھیلتے جا رہے ہیں کھنڈر سامنے

پھر کیوں نہ ہر قدم پہ نئی راہگزر ملے

شاعری