ٹال

ٹیگ

پیٹتا رہ اپنا سینہ، سُرخ اپنی کھال کر

ماجد صدیقی ۔ غزل نمبر 44

غم میں سب بچھڑے ہوؤں، کے اور پِیلے گال کر

پیٹتا رہ اپنا سینہ، سُرخ اپنی کھال کر

کاج تیرے صبحِ کاذب سے ہیں ڈھلتی شام تک

فکرِ فردا، فکرِدِی، کو چھوڑ، فکرِ حال کر

جس سے تیرا شاہ اور تیرے پیادے بچ سکیں

اے محافظ!اختیار ایسی بھی کوئی چال کر

بعدِ مدّت وہ کہ ہے آنے کو ماہِ عید سا

مکھ پہ مسکاتی رُتوں سے اُس کا استقبال کر

اس کے ہجرِ عارضی کا کیا پتہ؟ ہو یہ علاج

اپنے کاندھوں پر مزّین، اُس کی کومل شال کر

جیت سکتا ہے تو ہاں! لے جِیت قُربت یار کی

فائدہ کیا ہے، رقیبوں کو ذرا سا ٹال کر

جو متاعِ زندگی ماجد!دوبارہ ہے ملی

خرچ اُس کو کر ذرا تُو سینت کر سنبھال کر

ماجد صدیقی

جون 3, 2013 0

ساتھ دنوں کے ہر شکلِ احوال گئی

ماجد صدیقی ۔ غزل نمبر 91

ہم نے کھیلی وقت سے جو بھی چال گئی

ساتھ دنوں کے ہر شکلِ احوال گئی

ڈھانپنے والے تھے ہم جس سے سر اپنا

اُس سودے میں ساتھ ہی اپنی کھال گئی

خواہش، لُطف کی آخری حد چھُو لینے کی

چھین کے ہم سے کیا کیا ماہ و سال گئی

دیکھا رنگ اور رُوپ دلائے جس نے اِنہیں

پیڑوں کو آثار میں وُہ رُت ڈھال گئی

ہمیں چِڑانے باغ سے آتی تھی جو صبا

آخر ہم سے بھی ہو کر بے حال گئی

اُس چنچل کی بات کچھ ایسی پیچاں تھی

رگ رگ میں جو سو سو گرہیں ڈال گئی

ماجدؔ بات ہماری لیکھ سنورنے کی

ہر جاتی رُت اگلی رُت پر ٹال گئی

ماجد صدیقی

جون 2, 2010 0

دل کے شیشے میں جتنے بال آئے

ماجد صدیقی ۔ غزل نمبر 38

جی جلانے نہ اِتنے سال آئے

دل کے شیشے میں جتنے بال آئے

دشت میں کچھ رہا نہیں شاید

رات بستی میں پھر شغال آئے

کس پہ برسیں جُز اپنے پیکر کے

بُلبلوں کو گر اشتعال آئے

اے غمِ جاں! ترے کہے پر ہم

آج دل کا کہا بھی ٹال آئے

جن سے ہوتی تھی برہمی اُن کو

پھر نہ ہونٹوں پہ وہ سوال آئے

سانپ بھی تو لگے مہذّب ہی

زہر دانتوں سے جب نکال آئے

جس کے بس میں ہو کچھ ضرر ماجدؔ

ہاتھ اُسی کے ہی اب کمال آئے

ماجد صدیقی

جون 1, 2007 0

ہنسی ہنسی میں مری بات پھر وہ ٹال گیا

ماجد صدیقی ۔ غزل نمبر 13

اِک اور بار بھی غارت مرا سوال گیا

ہنسی ہنسی میں مری بات پھر وہ ٹال گیا

بحال کتنا ہی چہرہ ہو دیکھنے میں مگر

جو آئنے میں تھا دل کے نہیں وہ بال گیا

چہک رہا تھا کہ شاخوں میں سرسراہٹ سے

مرے سَرُور کا یک بارگی جمال گیا

لپک تھی جس کو دکھانے کی چال کا جادو

ہرن وہ آج اُدھڑوا کے اپنی کھال گیا

کھلا حساب خسارے کا پھر نیا ماجدؔ

شمارِ کرب و الم میں اک اور سال گیا

ماجد صدیقی

جون 1, 2007 0

تو بھی ہمیں نہ جنّتِ فردا پہ ٹال دے

ماجد صدیقی ۔ غزل نمبر 27

جاناں! کبھی تو مژدۂ لطفِ وصال دے

تو بھی ہمیں نہ جنّتِ فردا پہ ٹال دے

ہم گمرہی میں، غیر مگر راستی میں فرد

دیتا ہے وُہ، جسے بھی، جو اوجِ کمال دے

سجنے لگے شرر جو سرِ شاخِ آرزو

ایسا ثمر تو باغ میں کوئی نہ ڈال دے

اتنا تو بخش دے ہمیں اخفائے دردِ دل

حدّت وُہ دے جو اشک کو آہوں میں ڈھال دے

ایسا کوئی نہیں کہ جو یُوسف کہے تجھے

چاہے سخن کو جتنا بھی ماجدؔ جمال دے

ماجد صدیقی

جون 1, 2003 0

WordPress.com پر بلاگ.

Up ↑

ماجد صدیقی

شاعرِ بے مثال ماجد صدیقی مرحوم ۔ شخصیت اور شاعری

ٹیگ

ٹال

پیٹتا رہ اپنا سینہ، سُرخ اپنی کھال کر

ساتھ دنوں کے ہر شکلِ احوال گئی

دل کے شیشے میں جتنے بال آئے

ہنسی ہنسی میں مری بات پھر وہ ٹال گیا

تو بھی ہمیں نہ جنّتِ فردا پہ ٹال دے

شاعری