ویسا

ٹیگ

اُس میں مجھ میں فرق کیا، میں بھی اگر ویسا کروں

ماجد صدیقی ۔ غزل نمبر 216

اُس نے گھٹیا پن دکھایا ہے تو اُس کا کیا کروں

اُس میں مجھ میں فرق کیا، میں بھی اگر ویسا کروں

وہ نہ خوشبوئے بدن تک کی کرن لوٹا سکیں

تتلیوں کے ہاتھ نامے میں، جنہیں بھیجا کروں

سُرخرو مجھ سا، نہ مجھ سا ہو کوئی با آبرو

سامنے قدموں کے کھائی بھی اگر دیکھا کروں

مجھ کو ہر قیمت پہ دُھن بس کچھ نہ کچھ پانے کی ہے

میں نے کیا کھویا ہے اِس میں، یہ نہ اندازہ کروں

دَھجیاں اخلاق کی یوں ہیں گرانی سے اُڑیں

میہماں کوئی ہو اگلی پل اُسے چلتا کروں

وقت نے مدّت ہُوئی، جُوتے ہیں مرے اُلٹا دئے

کاش میں بھی یہ اشارے کچھ نہ کچھ سمجھا کروں

میرے اندر کا ضمیرِ مستعد بولے یہی

بدسلوکوں سے بھی ماجد میں سلوک اچّھا کروں

ماجد صدیقی

جون 4, 2013 0

اور معالج کئی ایسوں کا مسیحا نہ ہُوا

ماجد صدیقی ۔ غزل نمبر 171

کھیل ٹھہرا کسی مجروح کا اِحیا نہ ہُوا

اور معالج کئی ایسوں کا مسیحا نہ ہُوا

جس کی رگ رگ سے ترشّح ہے پُرانے پن کا

یہ کھنڈر سا ہے جو، دِل یہ تو ہمارا نہ ہُوا

کِشتِ جابر پہ رُتیں اور سے اور آتی گئیں

حق میں اُس کے تھا جو چاہا کبھی ویسا نہ ہُوا

دستِ منصف سے قلم اور طرف چل نکلا

رفعتِ دار پہ جو طَے تھا، تماشا نہ ہُوا

ٹیڑھ جو جو بھی تھی اُس کی وہ قبولی ہم نے

صرفِ جاں تک سے بھی کجرو سے گزارا نہ ہُوا

درجنوں ’دیس سنبھالے، کو پُھدکتے اُترے

پر کسی ایک سے بھی اِس کا مداوانہ ہُوا

جو بھی غاصب ہے بچو اُس سے کہ ماجد! اُس کی

نیّتِ خاص کسی کا بھی سہارا نہ ہُوا

ماجد صدیقی

جون 4, 2013 0

ہم سے کُھلنے پر وہ آیا تو بہت سارا کُھلا

ماجد صدیقی ۔ غزل نمبر 165

رکھ دیا دل کھول کر گویا ہو سر تا پا کُھلا

ہم سے کُھلنے پر وہ آیا تو بہت سارا کُھلا

رات کی رانی کی خوشبو میں صبا کے رقص میں

ہم نے آنکھیں ہی نہ کھولیں ورنہ وہ کیا کیا کُھلا

اپنے ہاں کی جو سیاست ہے، شکستہ خط میں ہے

جیسے اہلِ دِہ پہ پٹواری کا ہو بستا کُھلا

پُھول دِکھلایا تو اُس نے چاند دکھلایا ہمیں

جیسے جیسے ہم کُھلے ہم پر بھی وہ ویسا کُھلا

دیکھنے میں گو ہمارے پاس آن اُترا ہے وہ

جھیل میں اُترا جو چندا ہم پہ وہ اُلٹا کُھلا

رام کرنے کو ہمیں تاکا کبھی جھانکا کیا

وہ کہ پیکر تھا حیا کا ہم پہ کب پُورا کُھلا

ہاں کبھی یوں بھی کیا تھا ہم نے سجدہ شُکر کا

ہاں کسی چنچل کا ماجد ہم پہ بھی در تھا کُھلا

ماجد صدیقی

جون 4, 2013 0

بعد اُس کے کیا ہُوا؟ ہوتا ہے جو، ویسا ہُوا

ماجد صدیقی ۔ غزل نمبر 4

حق سرا دربار پہنچے تو سلوک اُلٹا ہُوا

بعد اُس کے کیا ہُوا؟ ہوتا ہے جو، ویسا ہُوا

ہم نے پُچھواناکیا ابلیس سے، کیوں پِٹ گئے؟

وہ یہ بولا، ساتھ اُس کے جو ہُوا اچّھا ہُوا

کی اطاعت میں رضا اپنی تو اَوجِ عرش سے

آ پڑے ہم فرش پر حُلیہ لیے بگڑا ہُوا

بے تفنگ و تِیر بہرِ صَید نکلے شوق سے

لَوٹ کر آئے تو چہرہ تھا بہت اُترا ہُوا

شیر صاحب نے ہرن پر ہاتھ کچّا ڈال کر

شیرنی کو آ دِکھایا رنگِ رُو، اُترا ہُوا

دہشتی انسان کیا سے کیا کرشمے کر چلے

پُشتِ خرپر ریت تک میں بمب تھا لپٹا ہُوا

فصل پہلی کھیت کی تھی یا بھلے کوئی دُلہن

چودھری کے گھر سے جو لَوٹا لگا برتا ہُوا

بامُرادی میں تھی ماجِد سُرخرُوئی اور ہی

بعدِ باراں آسماں جیسے لگے کھلتا ہُوا

ماجد صدیقی

جون 3, 2013 0

ننّھی ننّھی خواہشیں خلقت کی، جو اغوا کریں

ماجد صدیقی ۔ غزل نمبر 53

وہ کمانڈو بھی تو ہوں ایسوں کو جو سِیدھا کریں

ننّھی ننّھی خواہشیں خلقت کی، جو اغوا کریں

ہر نگارِ شام اُن کے واسطے ہو مہ بکف

ہم ہلالِ عید بعد از سال ہی دیکھا کریں

اُن کے جتنے تیر ہیں موزوں ہوں وہ اہداف پر

اور ہمیں تلقین یہ ،ایسا کریں ویسا کریں ،

خود ہی جب اقبال سا لکھنا پڑے اس کا جواب

اے خدا تجھ سے بھی ہم شکوہ کریں تو کیا کریں

وہ ادا کرتے ہیں جانے موسموں کو کیا خراج

بدلیاں جن کے سروں پر بڑھ کے خود سایا کریں

۲۲ فروری ۹۴ کو اسلام آباد میں افغانی اغوا کنندوں کے چنگل سے پاکستانی کمانڈوز نے سکول کے ننھے منے سٹوڈنٹس کو آزاد کرایا ۔ یہ غزل اُسی واقعہ سے متاثر ہو کر لکھی گئی

ماجد صدیقی

جون 1, 2002 0