روانی

ٹیگ

کچھ کرے گر تو جاودانی ہے

ماجد صدیقی ۔ غزل نمبر 200

عمر فانی ہے آنی جانی ہے

کچھ کرے گر تو جاودانی ہے

غیض میں اور، التفات میں اور

وہ کہ ہے آگ، وہ کہ پانی ہے

بس میں مشکل سے آئے مچھلی سا

خُو یہ اُس شوخ کی پرانی ہے

جیسے آب رواں پہ گُل تَیریں

چال میں اُس کی وہ روانی ہے

ظرف جس نے کشادہ تر رکھا

ہاں وہ انسانیت کا بانی ہے

نسل اُس کی فزوں ہوئی کیسے

یہ بھی آدم کی اک کہانی ہے

ہاں کبھی جانبِ نشیب نہ جا

تُو نے ماجد کہاں کی ٹھانی ہے

ماجد صدیقی

جون 4, 2013 0

نظر کیونکر نہ رکھیں اُس پہ جو رت بھی سہانی ہے

ماجد صدیقی ۔ غزل نمبر 71

ہمیں کاہے کو ہر پل پت جھڑوں سے بدگمانی ہے

نظر کیونکر نہ رکھیں اُس پہ جو رت بھی سہانی ہے

تعفّن آشنا ٹھہرے نہ ہو نابُود نظروں سے

وہ پانی خاک پر جس کو بہم پیہم روانی ہے

سحر کا دوپہر کا اور زوالِ شام کا منظر

تری ہو یا مری سب کی بس ایسی ہی کہانی ہے

حضور اپنے جو ہم جنسوں سے نت سجدے کراتا ہے

زمینی مت کہو اُس کو وہ حضرت آسمانی ہے

کسی کے جھوٹ کو تم جھوٹ ثابت کرکے دیکھو تو

سنو پھر اس سے کیا کیا پاس اُس کے گلفشانی ہے

وہ کنجشک و کبوتر ہو کہ ماجِد فاختہ اُس کے

پر و بازو میں لرزہ امن خواہی کی نشانی ہے

ماجد صدیقی

جون 3, 2011 0

اور مقیّد ہو کے نہروں کی روانی ہو گیا

ماجد صدیقی ۔ غزل نمبر 1

ابر بردوشِ ہوا رہ کر بھی پانی ہو گیا

اور مقیّد ہو کے نہروں کی روانی ہو گیا

لطفِ باراں سے، شگفتِ گُل سے جو منسوب تھا

ہاں وہی مضموں ادا میری زبانی ہو گیا

وہ کہ کہلاتا رہا تھا لالۂ صحرا کبھی

رنگ و خوشبو کی کشش سے میرا جانی ہو گیا

اُس نے اہلِ خاک سے پھر رابطہ رکھا نہیں

جس کو کچھ رفعت ملی وہ آسمانی ہو گیا

خواب میں اکثر لگا ایسا کہ صبح جاگتے

میں بھی اوروں کی طرح قصّہ کہانی ہو گیا

کھو کے سارے رنگ گردآلود، زنگ آلود سا

دل بھی ہے گزرے زمانوں کی نشانی ہو گیا

ہاں وہی ماجِد کہ تھا صورت گرِ جذبات جو

مانتے ہیں سب کہ ہے بہزاد و مانی ہو گیا

ماجد صدیقی

جون 2, 2011 0

ہاں وہ شخص کہ رات کی رانی جیسا ہے

ماجد صدیقی ۔ غزل نمبر 39

منظر کی تزئین میں ’مانی‘ جیسا ہے

ہاں وہ شخص کہ رات کی رانی جیسا ہے

آنکھ میں اُس کے لبوں کا وداعی سنّاٹا

ہاتھ میں مُندری کی سی نشانی جیسا ہے

رہبروں کے غبارے پھٹنے پر اپنا

عالم بّچوں کی حیرانی جیسا ہے

جس کی قبر کو ڈھانپنے تاج محل اُبھرے

وہ بے مثل ہے کون اُس رانی جیسا ہے

ہونٹ سِلے ہیں گویا بل بل ماتھے کا

تن میں ابلتا خوں طغیانی جیسا ہے

قّصہ اپنے ہاں کے سبھی منصوبوں کا

طوطے اور مَینا کی کہانی جیسا ہے

اُس چنچل کا قرب ہمیشہ کب حاصل

پل دو پل کا ساتھ جوانی جیسا ہے

اِس قطرے میں جانے الاؤ کیا کیا ہیں

آنکھ میں آنسو یوں تو پانی جیسا ہے

ماجدؔ تیرا فکر امینِ توانائی

اور سخن دریا کی روانی جیسا ہے

ماجد صدیقی

جون 2, 2009 0

WordPress.com پر بلاگ.

Up ↑

ماجد صدیقی

شاعرِ بے مثال ماجد صدیقی مرحوم ۔ شخصیت اور شاعری

ٹیگ

روانی

کچھ کرے گر تو جاودانی ہے

نظر کیونکر نہ رکھیں اُس پہ جو رت بھی سہانی ہے

اور مقیّد ہو کے نہروں کی روانی ہو گیا

ہاں وہ شخص کہ رات کی رانی جیسا ہے

شاعری