ردا

ماجد صدیقی ۔ غزل نمبر 196

ہم جو مضموں کی ہوا باندھتے ہیں

رخت میں نقدِ بقا باندھتے ہیں

اہلِ فن لفظ و ندا میں دیکھو!

کیسے سپنوں کا لکھا باندھتے ہیں

دل کے مَیلے ہیں جو کھولیں کیسے

جو گرہ اہلِ صفا باندھتے ہیں

جور بے طرح سخن میں لائیں

وہ جو زینب کی ردا باندھتے ہیں

وہ جنہیں اَوج نشینوں سے ملے

طرّۂ ناز بڑا باندھتے ہیں

وسوسہ دل میں نہ پالیں کوئی

ہم کہ ہر عہد کُھلا باندھتے ہیں

سوداکاری میں اَنا کی پڑ کے

لوگ جسموں کی بہا باندھتے ہیں

جو ہنرور ہیں نئی نسلوں کے

مٹھی مٹھی میں جلا باندھتے ہیں

وہ کہ موجد ہیں۔۔درونِ مادہ

نو بہ نو عکس و صدا باندھتے ہیں

بیٹیاں عمر بِتائیں روتے

اُن کو ماں باپ کُجا باندھتے ہیں

زور تن میں ہو تو ہر بات میں ہم

ناروا کو بھی روا باندھتے ہیں

ہو جہاں ذکرِ عقائد اس میں

ہم صنم تک کو خدا باندھتے ہیں

اپنے جیسوں پہ جو ڈھاتے ہیں ستم

اپنے پلّو میں وہ کیا باندھتے ہیں

سینہٗ شب میں کرے چھید وہی

ہم کہ جگنو کو دِیا باندھتے ہیں

ہم کبوتر کے پروں میں ماجد

لطفِ یاراں کا صلہ باندھتے ہیں

ماجد صدیقی

اُٹھا کے ہاتھ اُنہیں کاسۂ دُعا مانوں

ماجد صدیقی ۔ غزل نمبر 82

مرا نصیب یہ ہے خود کو بے نوا مانوں

اُٹھا کے ہاتھ اُنہیں کاسۂ دُعا مانوں

خمیر جس کا فقط گرد ہی سے اُٹھا ہو

میں ایسے ابر کو کس کھیت کی ردا مانوں

مری مراد پہ قابض ہیں بندگانِ خدا

کسے صغیر کہوں کس کو کِبریا مانوں

اِک عزم کا ہے سمندر تو اک کرم کا سحاب

جگر کو قلب سے کس طرح میں جدا مانوں

جسے کھنگال کے دیکھا وہ تھا اسیرِ ہوس

کسے حریص کہوں، کس کو باصفا مانوں

دباؤ کے ہیں کرشمے جسے جدھر لے جائیں

کسے میں فحش کہوں کس کو باحیا مانوں

یہ میرے فرق پہ چھاتا سی ہے جو صحرا میں

اِس اُڑتی ریت کو جُز ریت اور کیا مانوں

بروئے ارض ہم اہلِ خدا ہی کیوں کم ہیں

میں اہلِ شر کا یہ کیوں قولِ فتنہ زا مانوں

بڑا تضاد ہے ماجد کہے میں ہردو کے

بڑوں کا یا میں نئی نسل کا کہا مانوں

ماجد صدیقی

جون 3, 2013 0

پّتے نے یوں بھی، پریت نبھائی ہوا کے ساتھ

ماجد صدیقی ۔ غزل نمبر 25

ٹہنی سے جھڑ کے رقص میں آیا، ادا کے ساتھ

پّتے نے یوں بھی، پریت نبھائی ہوا کے ساتھ

وُہ بھی بزعمِ خویش ہے، کیا کُشتۂ وفا

چل دی ہے مغویہ جو، کسی آشنا کے ساتھ

خم ہے جو سر تو، کاسۂ دستِ دُعا بلند

کیا کچھ ہے لین دین ہمارا، خُدا کے ساتھ

جن کے سروں کوڈھانپ کے، ہم تم ہیں سرخرو

درکار جھونپڑے بھی اُنہیں ہیں، رِدا کے ساتھ

ژالوں نے جب سے، کھِلتے شگوفے دئیے بکھیر

ماجدؔ نجانے کد ہے مجھے کیوں، صبا کے ساتھ

ماجد صدیقی

جون 1, 2003 0

رسوائیِ خواہش کو، ہوا اور نہ دینا

ماجد صدیقی ۔ غزل نمبر 35

کافی ہے یہی، دل کو سزا اور نہ دینا

رسوائیِ خواہش کو، ہوا اور نہ دینا

پہلے ہی قفس میں ترے احسان بہت ہیں

گھاؤ کوئی، اے موجِ صبا! اور نہ دینا

کیا درد بٹاؤ گے کہ جس سِحر میں ہم ہیں

پتھر ہی نہ ہو جائیں صدا اور نہ دینا

صنّاع کہیں خود نہ کھنچا آئے زمیں پر

اِس چاند سے چہرے کو جِلا اور نہ دینا

حاصل ہے جو تجھ سے ہمیں پھولوں کی مہک سی

اُس قرب کی مہلت کو گھٹا اور نہ دینا

ہے اِس کی شرافت ہی خسارے کو کہاں کم

ماجد کو بزرگی کی رِدا اور نہ دینا

ماجد صدیقی

جون 1, 2002 0

کوئی صنم بھی تو ہو مَیں جِسے خُدا مانوں

ماجد صدیقی ۔ غزل نمبر 39

غزل لکھوں تو کِسے اپنا مُدّعا مانوں

کوئی صنم بھی تو ہو مَیں جِسے خُدا مانوں

مری ضیا سے مُنّور، مجھی سے بیگانہ

مَیں ایسے عہد کو کس طرح با صفا مانوں

حضور! آپ نے جو کچھ کہا، درست کہاں

مرا مقام ہی کیا ہے جو مَیں بُرا مانوں

جو میرے سر پہ ٹھہرتا تلک نہیں ماجدؔ

مَیں ایسے ابرِ گریزاں کو کیوں رِدا مانوں

ماجد صدیقی

جون 1, 2001 0

ماجد صدیقی

شاعرِ بے مثال ماجد صدیقی مرحوم ۔ شخصیت اور شاعری

ٹیگ

رخت میں نقدِ بقا باندھتے ہیں

اُٹھا کے ہاتھ اُنہیں کاسۂ دُعا مانوں

پّتے نے یوں بھی، پریت نبھائی ہوا کے ساتھ

رسوائیِ خواہش کو، ہوا اور نہ دینا

کوئی صنم بھی تو ہو مَیں جِسے خُدا مانوں

شاعری