دیکھا

اُس میں مجھ میں فرق کیا، میں بھی اگر ویسا کروں

ماجد صدیقی ۔ غزل نمبر 216

اُس نے گھٹیا پن دکھایا ہے تو اُس کا کیا کروں

اُس میں مجھ میں فرق کیا، میں بھی اگر ویسا کروں

وہ نہ خوشبوئے بدن تک کی کرن لوٹا سکیں

تتلیوں کے ہاتھ نامے میں، جنہیں بھیجا کروں

سُرخرو مجھ سا، نہ مجھ سا ہو کوئی با آبرو

سامنے قدموں کے کھائی بھی اگر دیکھا کروں

مجھ کو ہر قیمت پہ دُھن بس کچھ نہ کچھ پانے کی ہے

میں نے کیا کھویا ہے اِس میں، یہ نہ اندازہ کروں

دَھجیاں اخلاق کی یوں ہیں گرانی سے اُڑیں

میہماں کوئی ہو اگلی پل اُسے چلتا کروں

وقت نے مدّت ہُوئی، جُوتے ہیں مرے اُلٹا دئے

کاش میں بھی یہ اشارے کچھ نہ کچھ سمجھا کروں

میرے اندر کا ضمیرِ مستعد بولے یہی

بدسلوکوں سے بھی ماجد میں سلوک اچّھا کروں

ماجد صدیقی

جون 4, 2013 0

اُس میں مجھ میں فرق کیا، میں بھی اگر ایسا کروں

ماجد صدیقی ۔ غزل نمبر 61

اُس نے گھٹیا پن دِکھایا ہے تو اُس کا کیا کروں

اُس میں مجھ میں فرق کیا، میں بھی اگر ایسا کروں

وہ نہ خوشبوئے بدن تک کی کرن لوٹا سکیں

تتلیوں کے ہاتھ، میں نامے جنہیں بھیجا کروں

سُرخرو مجھ سا، نہ مجھ سا ہو کوئی با آبرو

سامنے قدموں کے کھائی بھی اگر دیکھا کروں

مجھ کو ہر قیمت پہ دُھن بس کچھ نہ کچھ پانے کی ہے

میں نے کیا کھویا ہے اِس میں، یہ نہ اندازہ کروں

دَھجیاں اخلاق کی یوں ہیں گرانی سے اُڑیں

میہماں کوئی ہو اگلی پل اُسے چلتا کروں

وقت نے توکب کے ہیں جُوتے مرے اُلٹا دئے

میں بھی تو ایسے اشارے کچھ نہ کچھ سمجھا کروں

میرے اندر کا ضمیرِ مستعد بولے یہی

بے ضمیروں سے بھی ماجد میں سلوک اچّھا کروں

ماجد صدیقی

جون 3, 2013 0

رُخ بہ رُخ نیّتیں بھی لکھا کر

ماجد صدیقی ۔ غزل نمبر 41

عرش پر بیٹھ کر نہ دیکھا کر

رُخ بہ رُخ نیّتیں بھی لکھا کر

بعد میں چاہے پھول بن کے کھلے

آگ پر لیٹ اور تڑپا کر

انت تیرانہیں ہے حشر سے کم

آدمی ہے تو یہ بھی سوچا کر

تو ہے عاصی جنم سے پہلے کا

روزوئی سا خود کو دھونکا کر

لے تو بس ہوش ہی کے ناخن لے

خوش قیاسی پہ ہی نہ جایا کر

پیڑ سے یا تو ٹُوٹنے ہی نہ پا

ٹہنیوں میں نہ پھرسے اٹکا کر

بحر کو چھو کے ہی نہ فاتح بن

ہاں تہوں تک بھی اِس کی اُتراکر

یاد کر کر کے کرب ہائے جاں

ذائقہ مت دہن کا پھیکا کر

جی نہ خوش فہمیوں کی جنّت میں

آنکھ دوزخ سے بھی ملایا کر

دیکھ اوروں کے ہی تماشے دیکھ

ایسا کرنے کو گھر نہ پھونکا کر

جسم اپنا ہی دھوپ سے نہ بچا

اپنے ہمسائے کو بھی پوچھا کر

ہاتھ آئے اگر شکار کوئی

ہاں بس اپنی ہی پیٹ پوجا کر

کرکے اعلان، حق بیانی کا

جھوٹ کم کم زباں پہ لایا کر

اے نمازی ثواب یہ بھی کما

حد سے کم گاہکوں کو لُوٹا کر

حج کی فرصت ملے تو جا کے وہاں

جیسا جائے نہ ویسا لَوٹا کر

جاں سے، دل سے عزیز روزہ دار!

روزہ داری کا حق نبھایا کر

مایہ اندوزیاں عزیز نہ رکھ

پل بھی کچھ زندگی کے سینتا کر

اے خنک طبع رات کی رانی

دن کی حدّت میں بھی تو مہکا کر

بند بوتل نشے کی وہ لڑکی

من کی خلوت میں جا کے کھولا کر

سارے ہتھیار اپنے تیز نہ رکھ

سادہ چشمی سے بھی تو دیکھا کر

جھونک مت حاویوں میں تُو اِن کو

بیٹیاں دیکھ کر بیاہا کر

وسعتِ لطف سا ہے وہ انگناں

اُس سے بیلوں کی طرح لپٹا کر

کون منہ میں ترے نوالے دے

خود مسائل سے اپنے نمٹا کر

اُس کی لپٹوں کو اوڑھ لے تن پر

وہ کہ خوشبو ہے اُس کو پہنا کر

ہم کہاں تجھ پہ بوجھ بننے لگے

دِل نہ اے شخص!اپنا چھوٹا کر

کر سکے تو نوالے اپنے کاٹ

میہماں کو نہ گھر سے چلتا کر

اُس کو تن پر کِھلا گُلاب سمجھ

منہ نہ روہانسا بنایا کر

دوسروں کا کیا نہ تُو گِنوا

تُونے خود کیا کیا وہ سمجھا کر

ہاں نہ ہر کِذب گو کی ہاں میں ملا

تُو ہے برحق تو خوب بولا کر

چاہے تیرے ضمیر ہی میں وہ ہو

گانٹھ ماجد ہر ایک کھولا کر

ماجد صدیقی

جون 3, 2013 0

خود سے بہتر شہر کے لوگوں کو دیکھا کیجئے

ماجد صدیقی ۔ غزل نمبر 40

حسرتیں اپنی جگانے گھر سے نکلا کیجئے

خود سے بہتر شہر کے لوگوں کو دیکھا کیجئے

بخت اُلٹے ہیں تو ہر نعمت سے کیجے احتراز

دھوپ سے محروم گھر ہی میں گزارا کیجئے

ہاتھ پاؤں مارئیے مقدور سے بڑھ کر یہاں

نرخ صَرفِ خوں سے ہی کچھ اپنا بالا کیجئے

گانٹھ کر انسان سے رشتہ حصولِ رزق کا

ہر کسی کا منہ پئے الطاف دیکھا کیجئے

اپنے حق میں لفظ بھی اِن کے غنیمت جانئے

دوستوں کی بات سے معنی نہ پیدا کیجئے

یوں نہ ہو ماجدؔ یہ ذکرِ درد اِک تہمت بنے

اِس قدر بھی نارسائی کا نہ شکوہ کیجئے

ماجد صدیقی

جون 3, 2012 0

جُگ بیتے وہ شخص نہیں ہے دیکھا جیسے

ماجد صدیقی ۔ غزل نمبر 39

آنکھوں میں آباد ہے ویرانہ سا جیسے

جُگ بیتے وہ شخص نہیں ہے دیکھا جیسے

کوئی چکور نہیں آتا ہے اُڑ کر ہم تک

ہم تنہا ہیں آسمان پر چندا جیسے

جب سے باغ نے ابر سے ہم آغوشی چاہی

اُڑنے لگا وہ اور بھی، اور بھی اُونچا جیسے

چھنی سماعت سے جب سے بُوندوں کی آہٹ

چاروں اور ہے ہیبت زا سنّاٹا جیسے

جب سے ماجِد عمر کی پت جھڑ زوروں پر ہے

گرد آلود ہُوئی ہر ایک تمنّا جیسے

ماجد صدیقی

جون 3, 2011 0

ہم نہ بتلا تے، نہیں، ایسا نہیں

ماجد صدیقی ۔ غزل نمبر 3

آپ ہی نے رازِدل پوچھا نہیں

ہم نہ بتلا تے، نہیں، ایسا نہیں

آپ سے ملنے کا ایسا تھا نشہ

رنگ تھا جیسے کوئی ،اُترا نہیں

سنگ دل تھے اہلِ دنیا بھی بہت

آپ نے بھی ،پیا ر سے دیکھا نہیں

دمبدم تھیں اِک ہمِیں پر یورشیں

تختۂ غیراں کبھی الٹا نہیں

توڑنا، پھر جوڑنا، پھر توڑنا

ہم کھلونوں پر کرم کیا کیا نہیں

ماجد صدیقی

جون 2, 2008 0

جو کیا ہے صاحبو! اچّھا کیا اچّھا کیا

ماجد صدیقی ۔ غزل نمبر 88

سامنے غیروں کے اپنے یار کو رُسوا کیا

جو کیا ہے صاحبو! اچّھا کیا اچّھا کیا

رفعتوں کی سمت تھیں اونچی اڑانیں آپ کی

اور میں بے چارگی سے آپ کو دیکھا کیا

آسماں ٹوٹا نہ گر، پھٹ جائے گی خود ہی زمیں

آنگنوں کے حبس نے یہ راز ہے افشا کیا

کل تلک کھُل جائے گا یہ بھید سارے شہر پر

ڈھانپنے کو عیب اپنے تم نے بھی کیا کیا کیا

گو سرِ ساحل تھا لیکن سیل ہی ایسا تھا کچھ

گال اپنے دیر تک ماجدؔ بھی سہلایا کیا

ماجد صدیقی

جون 2, 2007 0

اُس پر کیا لکھا جانا ہے

ماجد صدیقی ۔ غزل نمبر 0

کورا کاغذ سوچ رہا ہے

اُس پر کیا لکھا جانا ہے

نرخ نہیں گو ایک سے لیکن

ہر انسان یہاں بِکتا ہے

کون ہے گالی سُن کر جس کے

ہونٹوں سے امرت ٹپکا ہے

دشتِ طلب میں بِن کُتّوں کے

کس کے ہاتھ شکار لگا ہے

اپنی چال سلامت رکھنے

شیر ہرن پر ٹوٹ پڑا ہے

کُود کے جلتی آگ میں دیکھو

پروانہ گلزار بنا ہے

ٹھیک ہے گر بیٹا یہ سوچے

اُس نے باپ سے کیا پایا ہے

پکڑا جانے والا ہی کیوں

تنہا دم مجرم ٹھہرا ہے

جس نے بھی جاں بچتی دیکھی

تنکوں تک پر وہ اٹکا ہے

مجرم نے پچھلی پیشی پر

جو بھی کہا اُس سے مُکرا ہے

خالق اپنی خلق سے کھنچ کر

عرش پہ جانے کیا کرتا ہے

بہلانے مجھ بچّے کو وہ

جنت کا لالچ دیتا ہے

پیڑ زبانوں کو لٹکائے

دشت سے جانے کیا کہتا ہے

دیواروں سے ڈرتا ہو گا

کہنے والا کیوں ٹھٹکا ہے

موجِ الم نے کھول کے بازو

مجھ کو جیسے بھنچ لیا ہے

اُتنا ہی قد کاٹھ ہے اُس کا

جتنا جس کو ظرف ملا ہے

کس کو اَب لوٹانے جائیں

گردن میں جو طوق پڑا ہے

ٹہنی عاق کرے خود اُس کو

پھول وگرنہ کب جھڑتا ہے

جینے والا جانے کیونکر

موت کے در پر آن کھڑا ہے

صحرا کی بے درد ہوا نے

بادل کو کب رُکنے دیا ہے

دیکھوں اور بس دیکھو اُس کو

جانے اُس تصویر میں کیا ہے

کہنے کی باتیں ہیں ساری

زخمِ رگِ جاں کب بھرتا ہے

رُت کی خرمستی یہ جانے

پودا کیسے پیڑ بنا ہے

برق اور رعد کے لطف و کرم سے

گلشن کو کب فیض ملا ہے

لوٹایا اِک ڈنک میں سارا

سانپ نے جتنا دُودھ پیا ہے

ربط نہیں اُس سے اتنا بھی

شہر میں جتنا کچھ چرچا ہے

بند کلی چُپ رہنا اُس کا

لب کھولے تو پھولوں سا ہے

برگ و ثمر آنے سے پہلے

شاخ نے کیا کیا جبر سہا ہے

گُل برساتا ہے اوروں پر

وُہ جو زخم مجھے دیتا ہے

کوہِ قاف سے اِس جانب وہ

ڈھونڈوں بھی تو کب ملتا ہے

اُس کی دو رنگی مت پُوچھو

کالر پر جو پھول سجا ہے

رسّی کی شِشکار ہے پیچھے

کھیت کنارے جال بِچھا ہے

ڈس لیتا ہے سانپ جسے بھی

رَسّی تک سے وہ ڈرتا ہے

قبرپہ جل مرنے والے کی

ایک دیا اب تک جلتا ہے

بانس انار سے آنکھ ملائے

اپنی قامت ناپ رہا ہے

موسیٰ ہر فرعون کی خاطر

مشکل سے نت نت آتا ہے

سارے ہونٹ سلے ہیں پھر بھی

گلیوں میں اک حشر بپا ہے

دھڑکن دھرکن ساز جدا ہیں

کس نے کس کا دُکھ بانٹا ہے

کرنا آئے مکر جسے بھی

زر کے ساتھ وُہی تُلتا ہے

خون میں زہر نہیں اُترا تو

آنکھوں سے پھر کیا رِستا ہے

ہم اُس سے منہ موڑ نہ پائے

پیار سے جس نے بھی دیکھا ہے

کون ہے وہ جو محرومی کی

تہمت اپنے سر لیتا ہے

کھُلتی ہے ہر آنکھ اُسی پر

غنچہ جب سے پھول بنا ہے

انساں اپنا زور جتانے

چاند تلک پر جا نکلا ہے

دل نے پھر گُل کھِل اُٹھنے پر

نام کسی کا دہرایا ہے

وقت صفائی مانگ کے ہم سے

کاہے کو مُنہ کھُلواتا ہے

ہم شبنم کے قطروں پرہی

سورج داتا کیوں جھپٹا ہے

فصلِ سکوں پر بُغض یہ کس کا

مکڑی بن کر آ ٹوٹا ہے

دل تتلی کا پیچھا کرتے

کن کانٹوں میں جا اُلجھا ہے

زخم اگر بھر جائے بھی تو

نقش کہاں اُس کا مٹتا ہے

انجانوں سا مجھ سے وُہ پوچھے

اُس سے مرا دل مانگتا کیاہے

پھول جھڑیں یا پتے سُوکھیں

موسم نے یہ کب دیکھا ہے

اَب تو دل کی بات اٹھاتے

لفظ بھی چھلنی سے چھنتاہے

تجھ بن جو منظر بھی دیکھیں

آنکھ میں کانٹوں سا چُبھتا ہے

کانوں کے دَر کھُل جائیں تو

پتھر تک گویا لگتا ہے

آنکھوں کی اِس جھیل میں جانے

کون کنول سا لہراتا ہے

دور فلک پر کاہکشاں کا

رنگ ترے سپنوں جیسا ہے

گلشن والے کب جانیں یہ

پنجرے میں دن کب ڈھلتا ہے

صبح اُسی کے صحن میں اُتری

جس کا دامن چاک ملا ہے

جانے کس خرمن پر پہنچے

تابہ اُفق جو کھیت ہرا ہے

مَیں وہ غار تمّنا کا ہوں

سورج جس سے رُوٹھ گیا ہے

جانے کیا کیا زہر نہ پی کر

انساں نے جینا سیکھا ہے

بحر پہ پُورے چاند کے ہوتے

پانی کیوں ٹھہرا ٹھہرا ہے

وہ کب سایہ سینت کے رکھے

رستے میں جو پیڑ اُگا ہے

اُس کا حسن برابر ہو تو

حرف زباں پر کب آتا ہے

دیکھنے پر اُس آئنہ رُو کے

پھولوں کا بھی رنگ اُڑا ہے

پھل اُترا جس ٹہنی پر بھی

پتھر اُس پر آن پڑا ہے

کب اوراق پُرانے پلٹے

وُہ کہ مجھے جو بھول چکا ہے

اپنی اپنی قبر ہے سب کی

کون کسی کے ساتھ چلا ہے

اَب تو اُس تک جانے والا

گستاخی کا ہی رستہ ہے

اُونٹ چلے ڈھلوان پہ جیسے

ایسا ہی کچھ حال اپنا ہے

لُٹ کے کہے یہ شہد کی مکھی

محنت میں بھی کیا رکھا ہے

کس نے آتا دیکھ کے مجھ کو

بارش میں در بھینچ لیا ہے

اُس سے حرفِ محبت کہنے

ہم نے کیا کیا کچھ لکھا ہے

دامن سے اُس شوخ نے مجھ کو

گرد سمجھ کر جھاڑ دیا ہے

فرق ہے کیوں انسانوں میں جب

سانس کا رشتہ اِک جیسا ہے

فرصت ہی کب پاس کسی کے

کون رُلانے بھی آتا ہے

یادوں کے اک ایک ورق پر

وُہ کلیوں سا کھِل اُٹھتا ہے

شیر بھی صید ہُوا تو آخر

دیواروں پر آ لٹکا ہے

نُچنے سے اِک برگ کے دیکھو

پیڑ ابھی تک کانپ رہا ہے

ایک ذرا سی چنگاری نے

سارا جنگل پھونک دیا ہے

لفظ سے پاگل سا برتاؤ

ساگر ناؤ سے کرتا ہے

بہلا ہے دل درد سے جیسے

بچہ کانچ سے کھیل رہا ہے

کڑوے پھل دینے والے کا

رشتہ باغ سے کب ملتا ہے

خدشوں میں پلنے والوں نے

سوچا ہے جو، وُہی دیکھا ہے

اپنے اپنے انت کو پانے

جس کو دیکھو دوڑ رہا ہے

زور آور سبزے نے دیکھو

بادل سے حق مانگ لیا ہے

کس رُت کے چھننے سے جانے

صحنِ گلستاں دشت ہوا ہے

ہونٹ گواہی دیں نہ کچھ اُس کی

دل میں جتنا زہر بھرا ہے

لفظ کے تیشے سے ابھرے جو

زخم وہی گہرا ہوتا ہے

آنکھ ٹھہرتی ہے جس پر بھی

منظر وُہ چھالوں جیسا ہے

بن کر کالی رات وہ دیکھو

کّوا چڑیا پر جھپٹا ہے

جتنا اپنے ساتھ ہے کوئی

اُتنا اُس کے ساتھ خُدا ہے

اونچی کر دے لو زخموں کی

پرسش وُہ بے رحم چِتا ہے

ساکت کر دے جو قدموں کو

جیون وُہ آسیب ہُوا ہے

دشت تھا اُس کا ہجر پہ ہم نے

یہ صحرا بھی پاٹ لیا ہے

مجھ سے اُس کا ذکر نہ چھیڑو

وہ جیسا بھی ہے اچّھا ہے

ساتھ ہمارے ہے وہ جب سے

اور بھی اُس کا رنگ کھُلا ہے

شاہی بھی قربان ہو اُس پر

ماجدؔ کو جو فقر ملا ہے

ماجد صدیقی

جون 1, 2007 0

سانپ کو ہاتھ میں پکڑا پر ڈھیلے انداز سے پکڑا ہے

ماجد صدیقی ۔ غزل نمبر 54

اُس نے بھی جو زہریلے دشمن پر اب کے جھپٹا ہے

سانپ کو ہاتھ میں پکڑا پر ڈھیلے انداز سے پکڑا ہے

جتنے ہم مسلک تھے اُس کے کیا کیا اُس سے دُور ہوئے

دنیا نے اک جسم کو یوں بھی ٹکڑے ہوتے دیکھا ہے

زور آور نے جتنا بھی باروری بیج تھا نخوت کا

ساون رُت کی بارش جیسا اُس کی خاک میں بویا ہے

اور تو امّ الحرب کو ہم عنوان نہیں کچھ دے سکتے

ہاں خاشاک نے دریا کو چالیس دنوں تک روکا ہے

ماجد جھُکتے سروں سے آخر یہِاک بات بھی سب پہ کھلی

کھٹکا ہے تو نفقہ و نان کا ہم ایسوں کو کھٹکا ہے

جنگِ خلیج کے پس منظر میں

ماجد صدیقی

جون 1, 2006 0

جو کہنا ہے، پہلے کیوں نہ پرکھا جائے

ماجد صدیقی ۔ غزل نمبر 53

یہ کیا؟ کچھ کہنے کے بعد ہی سوچا جائے

جو کہنا ہے، پہلے کیوں نہ پرکھا جائے

مان بھی لیں، ممکن ہے، قدم اپنے ہی غلط ہوں

دُور نکل آئے ہیں بہت، اب لوٹا جائے

کھوج میں شاید شرط یہی، بار آور ٹھہرے

اور ذرا گہرے پانی میں، اُترا جائے

دریا میں کھُر جائے گھڑا کھُر جانے والا

ٹھہرا ہو جو عہد وہ عہد نہ توڑا جائے

مژدۂ عید سنانے والا چاند، ہمیشہ

بعد برس کے، پھر چاہت سے دیکھا جائے

ماجد صدیقی

جون 1, 2006 0

اتنا میٹھا ہے کہ کڑوا لاگے

ماجد صدیقی ۔ غزل نمبر 61

کیا کہیں کیسا وُہ اچّھا لاگے

اتنا میٹھا ہے کہ کڑوا لاگے

جُھوٹ اُس نہج کو پہنچا ہے کہ اَب

حق سرائی بھی تماشا لاگے

ہاتھ شہ رگ پہ بھی رکھتا ہے مدام

وُہ کہ ظاہر میں مسیحا لاگے

دردمیں اَب کے وُہ شدّت اُتری

آنچ بھی جس کا مداوا لاگے

جیسے اپنا ہی چلن ہو ماجدؔ

مکر اس طور سے دیکھا لاگے

ماجد صدیقی

جون 1, 2003 0

کس دن کنجِ قفس دیکھا تھا یاد نہیں ہے

ماجد صدیقی ۔ غزل نمبر 47

راہوں میں کب جال بچھا تھا یاد نہیں ہے

کس دن کنجِ قفس دیکھا تھا یاد نہیں ہے

آناً فاناً ہی اِک حشر نظر میں اُٹھا

کاشانہ کس آن جلا تھا یاد نہیں ہے

چپّو چّپو کب گرداب بنے تھے پہلے

طوفاں نے کب گھیر لیا تھا یاد نہیں ہے

یاد ہے آنکھوں کے آگے اِک دُھند کا منظر

کس پل مجھ سے وُہ بچھڑا تھا یاد نہیں ہے

اپنوں ہی میں شاید کُچھ بیگانے بھی تھے

کس جانب سے تیر چلا تھا یاد نہیں ہے

طولِ شبِ ہجراں میں دل کے بانجھ اُفق پر

آس کا چندا کب ڈوبا تھا یاد نہیں ہے

تلخ ہوئی کب اُس کے لہجے کی شیرینی

سانسوں میں کب زہر گھُلا تھا یاد نہیں ہے

تنُد ہوا کو تیغوں جیسا تنتے ویکھا

پیڑ سے رشتہ کب ٹوٹا تھا یاد نہیں ہے

اُس سے اپنا ناتا جُڑتے تو دیکھا تھا

یہ دھاگا کیونکر اُلجھا تھا یاد نہیں ہے

جس پر اُس چنچل کے حکم کی چھاپ لگی تھی

مَیں نے وہ پھل کیوں چکّھا تھا یاد نہیں ہے

گھر گھر فریادی بانہوں کی فصل اُگی تھی

شہر کا موسم کیوں ایسا تھا یاد نہیں ہے

سجتی دیکھ کے سرمے سی شب آنکھوں آنکھوں

میں جانے کیوں چیخ پڑا تھا یاد نہیں ہے

نیل گگن کے نیچے ننھی آشاؤں کا

خیمہ کیسے خاک ہوا تھا یاد نہیں ہے

جگنو جگنو روشنیوں پر لُوٹ مچاتے

اُس کا ماتھا کب چمکا تھا یاد نہیں ہے

طیش میں آ کر جب وہ برسا تو آگے سے

ماجدؔ نے کیا اُس سے کہا تھا یاد نہیں ہے

ماجد صدیقی

جون 1, 2003 0

ننّھی ننّھی خواہشیں خلقت کی، جو اغوا کریں

ماجد صدیقی ۔ غزل نمبر 53

وہ کمانڈو بھی تو ہوں ایسوں کو جو سِیدھا کریں

ننّھی ننّھی خواہشیں خلقت کی، جو اغوا کریں

ہر نگارِ شام اُن کے واسطے ہو مہ بکف

ہم ہلالِ عید بعد از سال ہی دیکھا کریں

اُن کے جتنے تیر ہیں موزوں ہوں وہ اہداف پر

اور ہمیں تلقین یہ ،ایسا کریں ویسا کریں ،

خود ہی جب اقبال سا لکھنا پڑے اس کا جواب

اے خدا تجھ سے بھی ہم شکوہ کریں تو کیا کریں

وہ ادا کرتے ہیں جانے موسموں کو کیا خراج

بدلیاں جن کے سروں پر بڑھ کے خود سایا کریں

۲۲ فروری ۹۴ کو اسلام آباد میں افغانی اغوا کنندوں کے چنگل سے پاکستانی کمانڈوز نے سکول کے ننھے منے سٹوڈنٹس کو آزاد کرایا ۔ یہ غزل اُسی واقعہ سے متاثر ہو کر لکھی گئی

ماجد صدیقی

جون 1, 2002 0

ماجد صدیقی

شاعرِ بے مثال ماجد صدیقی مرحوم ۔ شخصیت اور شاعری

ٹیگ

اُس میں مجھ میں فرق کیا، میں بھی اگر ویسا کروں

اُس میں مجھ میں فرق کیا، میں بھی اگر ایسا کروں

رُخ بہ رُخ نیّتیں بھی لکھا کر

خود سے بہتر شہر کے لوگوں کو دیکھا کیجئے

جُگ بیتے وہ شخص نہیں ہے دیکھا جیسے

ہم نہ بتلا تے، نہیں، ایسا نہیں

جو کیا ہے صاحبو! اچّھا کیا اچّھا کیا

اُس پر کیا لکھا جانا ہے

سانپ کو ہاتھ میں پکڑا پر ڈھیلے انداز سے پکڑا ہے

جو کہنا ہے، پہلے کیوں نہ پرکھا جائے

اتنا میٹھا ہے کہ کڑوا لاگے

کس دن کنجِ قفس دیکھا تھا یاد نہیں ہے

ننّھی ننّھی خواہشیں خلقت کی، جو اغوا کریں

شاعری