دکھاتا

ٹیگ

جھونکے سے جانے کیا اپنا ناتا ہے

ماجد صدیقی ۔ غزل نمبر 68

کُنجِ قفس تک بھی خوشبو سی لاتا ہے

جھونکے سے جانے کیا اپنا ناتا ہے

پِٹوا کر سہلائے یُوں ہر پنیچ ہمیں

بالغ جیسے بچّے کو بہلاتا ہے

ظالم کے ہتھے جو بھی اِک بار چڑھے

جیون بھرُوہ اُس کے ہی گُن گاتا ہے

پنچھی سوچیں اَب وُہ ایکا کرنے کی

جو ایکا مرگِ انبوہ دکھاتا ہے

سینت کے رکھے صید نہ اپنا زورآور

شیر کے من کو تازہ خون ہی بھاتا ہے

جس کے سر تھا خون کسی کا شخص وُہی

اَب قبروں پر پھول چڑھانے آتا ہے

ماجدؔ بھی کیا سادہ ہے اخلاص پہ جو

رہ رہ کر اِس دَور میں بھی اِتراتا ہے

ماجد صدیقی

جون 2, 2010 0

سِفلوں سے پالا پڑتا ہے راز یہ تب کُھل پاتا ہے

ماجد صدیقی ۔ غزل نمبر 33

کُتا آنکھیں کب دکھلاتا ہے کب دُم لہراتا ہے

سِفلوں سے پالا پڑتا ہے راز یہ تب کُھل پاتا ہے

خلق سے بھی کھنچتا ہے آئینے سے بھی کتراتا ہے

جس کے دل میں چور ہو خود سے بھی کم آنکھ ملاتا ہے

جویائے تعبیر رہے وہ خواب میں قامتِ بالا کی

بَونے کی یہ خُو ہے سوتے میں بھی وہ اِٹھلاتا ہے

اِس سے ہٹ کر کم کم ہو، ہوتا ہے اکثر ایسا ہی

باپ نے جو جَھک ماری ہو بیٹا بھی اسے دُہراتا ہے

جس کوتاہ نظر کو بھی احساس ہو کمتر ہونے کا

برتر پر چھا جانے کو وہ اور ہی طیش دِکھاتا ہے

خاک کو دریا دل ہو کر جب سرمۂ چشم بنایا تھا

ماجدؔ جانے وہ لمحہ کیوں رہ رہ کر یاد آتا ہے

ماجد صدیقی

جون 2, 2009 0

نجانے یہ دل جشن کیا کیا مناتا تم آئے تو ہوتے

ماجد صدیقی ۔ غزل نمبر 18

زرونقدِراحت تمہی پر لٹاتا تم آئے تو ہوتے

نجانے یہ دل جشن کیا کیا مناتا تم آئے تو ہوتے

گلے میں حمائل سجل ضَو کے ہالے، سرِبام چندا

جہاں بھر کو میں اپنی پونجی دکھاتا تم آئے تو ہوتے

کلی کی چٹک سی ،زمیں پر نئی بوندیوں کی کھنک سی

نرالی دھنیں میں لبوں پر سجاتا تم آئے تو ہوتے

مجھے کس طرح تم جلاتے بجھاتے رہے فرقتوں میں

تمہیں جَور اک اک تمہارا سُجھاتا تم آئے تو ہوتے

ان اشکوں کے آنکھوں سے فرطِمسرت میں جو پھوٹتے ہیں

نئے دیپ پلکوں پہ اپنی جلاتا تم آئے تو ہوتے

ماجد صدیقی

جون 2, 2008 0

جابر جابر اپنا عِجز دکھاتا رہ

ماجد صدیقی ۔ غزل نمبر 81

نیکوں کی فہرست میں نام لکھاتا رہ

جابر جابر اپنا عِجز دکھاتا رہ

ہے تیرا مقدور، سرِ دربار یہی

چانٹے کھا اور گالوں کو سہلاتا رہ

پھیر سیاہی محرومی کے اُکروں پر

درس یہی، ہر آتی پل دُہراتا رہ

بندہ ہے تو اور بھلا کیا کام ترا

ہاتھ خداؤں کے آگے پھیلاتا رہ

ختم نہ ہونے دے اپنی یہ نادانی

بھینس کے آگے ماجدؔ بین بجاتا رہ

ماجد صدیقی

جون 1, 2003 0

WordPress.com پر بلاگ.

Up ↑

ماجد صدیقی

شاعرِ بے مثال ماجد صدیقی مرحوم ۔ شخصیت اور شاعری

ٹیگ

دکھاتا

جھونکے سے جانے کیا اپنا ناتا ہے

سِفلوں سے پالا پڑتا ہے راز یہ تب کُھل پاتا ہے

نجانے یہ دل جشن کیا کیا مناتا تم آئے تو ہوتے

جابر جابر اپنا عِجز دکھاتا رہ

شاعری