خم – ماجد صدیقی

سرِدشت آہو کا رم دیکھتے ہیں

ماجد صدیقی ۔ غزل نمبر 195

نشیلا، ترا ہر قدم دیکھتے ہیں

سرِدشت آہو کا رم دیکھتے ہیں

سرِ سرو بھی تیری قامت کے آگے

لگے جیسے اندر سے خم دیکھتے ہیں

مناظر جہاں ہوں دل آزاریوں کے

شہِ وقت اُس سمت کم دیکھتے ہیں

ہماری کسی بات سے تو نہیں ہے؟

یہ کیوں؟تیرے پلّو کونم دیکھتے ہیں

دُھواں دُھول اور شور ہیں عام اِتنے

کہ سانسوں تلک میں بھی سم دیکھتے ہیں

تری آنکھ پر راز افشانیاں ہیں

ترے پاس بھی جامِ جم دیکھتے ہیں

مسلسل ہے ماجد یہ کیوں ژالہ باری

کہ ہر سو ستم پر ستم دیکھتے ہیں

ماجد صدیقی

جون 4, 2013 0

ہو جو پیری میں دم تو کیا کہنے

ماجد صدیقی ۔ غزل نمبر 133

لے میں ہو زیر و بم تو کیا کہنے

ہو جو پیری میں دم تو کیا کہنے

دم آخر تلک خیالوں میں

ہو غزالوں سا رم تو کیا کہنے

ہائے یہ سرو قامتی اپنی

ہو نہ پائے جو خم تو کیا کہنے

شوخ لفظی، عمیق فکری میں

دے دکھائی صنم تو کیا کہنے

التفات شہان و فرعوناں

بیش ہو اور نہ کم تو کیا کہنے

ہو کہیں، باہمی تعلق میں

رہ سکے جو بھرم تو کیا کہنے

میر و غالب کے درمیاں ماجد

ہو جو مسند بہم تو کیا کہنے

ماجد صدیقی

جون 3, 2013 0

’جیون رس، کم دیکھ رہے ہیں

ماجد صدیقی ۔ غزل نمبر 94

ہونٹ ہونٹ سَم دیکھ رہے ہیں

’جیون رس، کم دیکھ رہے ہیں

ارضِ وطن پر بیتنے والا

کیا کیا موسم دیکھ رہے ہیں

خواب تلک میں جو نہ تھے، اب ہر سُو

پھٹتے وہ بم دیکھ رہے ہیں

چیں ہے جبینوں پرہر جانب

ابروؤں میں خم دیکھ رہے ہیں

ہم، سازش جس سمت ہے برپا

اُس جانب کم دیکھ رہے ہیں

صحراؤں میں پنپنے والے

پلک پلک نم دیکھ رہے ہیں

ماجِد بس اِک تیرے سخن میں

ہرنوں سا رم دیکھ رہے ہیں

ماجد صدیقی

جون 3, 2013 0

شہرِ سخن میں لوگ ہمیں کم کم مانیں

ماجد صدیقی ۔ غزل نمبر 62

اُن میں سے اِک ایک کو بے شک ہم مانیں

شہرِ سخن میں لوگ ہمیں کم کم مانیں

قامتِ یار کہیں ہرغم کے الاؤ کو

جیون کی ہر ٹیڑھ کو زلف کا خم مانیں

آئنہ سا جو چہرہ ہر دم پاس رہے

ہم تو بس اُس کو ہی جامِ جم مانیں

کیا کیا آس نجانے اُس سے لگا بیٹھیں

ہم جس کو ہم جنس کہیں، آدم مانیں

بچپن میں بھی دھوپ ہمیں ہی جلاتی تھی

پِیری میں بھی دھونس اُسی کی ہم مانیں

روتا دیکھ کے غیر ہمیں خوش کیونکر ہوں

اپنی آنکھیں ہم کیوں ماجد نم، مانیں

ماجد صدیقی

جون 3, 2013 0

اُس کی نیّت ہو چلی تھی بھیگے موسم کی طرح

ماجد صدیقی ۔ غزل نمبر 68

مُڑنے والی تھی وُہ ساحل کی طرف یم کی طرح

اُس کی نیّت ہو چلی تھی بھیگے موسم کی طرح

اُس کی انگڑائی میں دعوت تھی بہ اندازِ دگر

ابروؤں میں آنے والے دلنشیں خم کی طرح

پیش قدمی میں عجب امرت تھا پھیلا چار سُو

اُس کا ہر ہٹتا قدم لگنے لگا سم کی طرح

کہہ رہا تھا مجھ سے جیسے اُس کا فردوسِ بدن

دیکھنا رہ سے بھٹک جانا نہ آدم کی طرح

نشّۂ دیدار اُس کا اب کے تھا کُچھ اور ہی

آنکھ میں اُتری لگی وُہ کیفِ پیہم کی طرح

یہ بدن ماجِد سحرآثار ہو جانے لگا

اس سے ملنے کا اثر تھا گل پہ شبنم کی طرح

ماجد صدیقی

جون 3, 2011 0

کون کہے یہ رنج نظر کا کب جا کر کم ہونا ہے

ماجد صدیقی ۔ غزل نمبر 33

جب تک گرد گُلوں پر ہے اِن آنکھوں کو نم ہونا ہے

کون کہے یہ رنج نظر کا کب جا کر کم ہونا ہے

رفتہ رفتہ اندر سے دیمک سا اُنہیں جو چاٹ سکے

ایمانوں میں زہر ریا کا اور ابھی ضم ہونا ہے

جانے کب تک ٹوہ لگانے اِک اِک جابر موسم کی

دل کو ساغر میں ڈھلنا ہے اور ہمیں جم ہونا ہے

ایک خُدا سے ہٹ کر بھی کچھ قادر راہ میں پڑتے ہیں

جن کی اُونچی دہلیزوں پر اِس سر کو خم ہونا ہے

آگے کی یہ بات کہاں بتلائے لُغت اُمیدوں کی

کان میں پڑنے والے کن کن لفظوں کو سم ہونا ہے

اور طرح سے بدلے دیکھے اَبکے گھاٹ مچانوں میں

تیروں پر تحریر جہاں ہر آہو کا رَم ہونا ہے

دل کو جو بھی آس لگی وُہ خوابِ جِناں بن جائے گی

دریاؤں کو جیسے ماجدؔ بحر میں مدغم ہونا ہے

ماجد صدیقی

جون 2, 2010 0

بادل نے جہاں بھی کہیں بے نم ہمیں دیکھا

ماجد صدیقی ۔ غزل نمبر 25

شاہوں ساجو دیکھا بھی تو ہے کم ہمیں دیکھا

بادل نے جہاں بھی کہیں بے نم ہمیں دیکھا

منشا تھی ہر اوتار کی اِتنی سی کہ اُس نے

مسرور تھا جب بھی، بہ سرِ خم ہمیں دیکھا

ہر تُند بگولے نے ہر اِک سیلِ غضب نے

دیکھا بھی تو تنکوں ہی سا برہم ہمیں دیکھا

ہر دیکھنے والے نے دھندلکے میں حسد کے

مہتابِ سرِ صبح سا مدّھم ہمیں دیکھا

ماجدؔ ہوئے ہم اوس کنارِ لبِ جُو کی

ہر موج نے ندیا ہی میں مدغم ہمیں دیکھا

ماجد صدیقی

جون 2, 2009 0

کام بہت سارے ہیں، فرصت کم لگتی ہے

ماجد صدیقی ۔ غزل نمبر 9

جیون رُت کی سختی بے موسم لگتی ہے

کام بہت سارے ہیں، فرصت کم لگتی ہے

صبحِ سفر یادوں میں اُترتی ہے یوں جیسے

رفتہ رفتہ رات کی چادر نم لگتی ہے

سوچیں خلق کے حق میں اچّھا سوچنے والے

خلق اُنہی سے آخر کیوں برہم لگتی ہے

ان سے توقّع داد کی ہم کیا رکھیں جن کے

بات لبوں کے بیچ سے پھوٹی سم لگتی ہے

بات فقط اک لمبی دیر گزرنے کی ہے

جگہ جگہ پر کیا کیا کھوپڑی، خم لگتی ہے

بَیری رات کے آخر میں جو جا کے بہم ہو

آنکھ کنارے اٹکی وہ شبنم لگتی ہے

کچھ تو اندھیرا بھی خاصا گمبھیر ہوا ہے

کچھ ماجدؔ لَو دیپ کی بھی مدّھم لگتی ہے

ماجد صدیقی

جون 2, 2009 0

کبھی وُہ رُخ بھی سپردِ قلم کیا جائے

ماجد صدیقی ۔ غزل نمبر 141

ورق پہ دشتِ طلب کے رقم کیا جائے

کبھی وُہ رُخ بھی سپردِ قلم کیا جائے

فلک سے فصل نے ژالوں کی کب دعا کی ہے

کسی نے کب یہ کہا ہے، ستم کیا جائے

اساس جس کی مسّرت میں التوا ٹھہرے

نہ ہم پہ اور اب ایسا کرم کیا جائے

ستم کشی کہ جو عادت ہی بن گئی اپنی

اِسے نہ رُو بہ اضافہ، نہ کم کیا جائے

ہر ایک سر کا تقاضاہے یہ کہ تن پہ اگر

لگے تو اُس کو بہرحال خم کیا جائے

بہم نہیں ہیں جو موسم کی خنکیاں ماجدؔ

تو کیوں نہ آنکھ کا آنگن ہی نم کیا جائے

ماجد صدیقی

جون 2, 2007 0

زیست کا اِک اور دن کم ہو گیا

ماجد صدیقی ۔ غزل نمبر 130

مہرِ رخشاں رات میں ضم ہو گیا

زیست کا اِک اور دن کم ہو گیا

لکھ رہا تھا جانے کیا کاغذ پہ میں

آنکھ بھر آنے سے جو نم ہو گیا

دل نجانے ہم سخن کس سے ہوا

حرف کا امرت بھی ہے سم ہو گیا

ڈوبتے ہی اِک ذرا اُس ماہ کے

دیکھیے کیا دل کا عالم ہو گیا

کم نہیں یہ مُعجزہ اِس دَور کا

ذرّہ ذرّہ ساغرِ جم ہو گیا

بچ کے ماجدؔ جس سے نکلے تھے کبھی

سر اُسی دہلیز پر خم ہو گیا

ماجد صدیقی

جون 2, 2007 0

ہو ترا کرم اَب کے

ماجد صدیقی ۔ غزل نمبر 15

چاہتے ہیں ہم اَب کے

ہو ترا کرم اَب کے

لُوٹنے کو جی چاہے

لطفِ کیف و کم اَب کے

حبس وُہ لُہو میں ہے

گھُٹ رہا ہے دم اَب کے

مثلِ ماہ و شب ہم بھی

کیوں نہ ہوں بہم اَب کے

کُچھ تو محو ہونے دے

ابروؤں کے خم اَب کے

پوچھتی ہے کیا ماجدؔ

موسموں کی نم اَب کے

ماجد صدیقی

جون 1, 2004 0

خُدا سمجھتے رہے تھے جِسے صنم نکلا

ماجد صدیقی ۔ غزل نمبر 76

نہیں کُچھ ایسا تغافل میں وُہ بھی کم نکلا

خُدا سمجھتے رہے تھے جِسے صنم نکلا

یہاں کے لوگ اذیّت پسند ہیں کیا کیا

مِلے جِسے بھی وُہ گرویدۂ ستم نکلا

وُہی جو قلقلِ خوں میں تھا رقصِ بِسمل کے

کُچھ اپنی لے میں بھی ایسا ہی زیر و بم نکلا

یقیں نہیں ہے پہ حسبِ روایتِ غیراں

جنم ہمارا بھی ہے ناطلب جنم نکلا

سنور گئے ہیں یہاں قصر کیا سے کیا ماجدؔ

مِرے مکان کی دیوار کا نہ خم نکلا

ماجد صدیقی

جون 1, 2003 0

خُشکیاں اپنے یہاں کی اور ہیں، نم اور ہے

ماجد صدیقی ۔ غزل نمبر 14

بانجھ ہے برکھا پون،آنکھوں کا موسم اور ہے

خُشکیاں اپنے یہاں کی اور ہیں، نم اور ہے

خون میں اُترے فقط، گمراہی افکار سے

دی نہ جائے اور جاں لیوا ہو جو، سَم اور ہے

ناتوانوں کے کوائف، جام میں کر لے کشید

ہم ہوئے جس عہد میں، اِس عہد کا جم اور ہے

چیت کی رُت میں، غزالوں کے بدن کی شاعری

اور ہے، اور خوف میں اُلجھا ہوا رم، اور ہے

میں بھی دے بیٹھا ہوں دل ماجدؔ، مگر یہ جان کر

ابروؤں کا اور ہے، دیوار کا خم اور ہے

ماجد صدیقی

جون 1, 2003 0

ماجد صدیقی

شاعرِ بے مثال ماجد صدیقی مرحوم ۔ شخصیت اور شاعری

ٹیگ

خم

سرِدشت آہو کا رم دیکھتے ہیں

ہو جو پیری میں دم تو کیا کہنے

’جیون رس، کم دیکھ رہے ہیں

شہرِ سخن میں لوگ ہمیں کم کم مانیں

اُس کی نیّت ہو چلی تھی بھیگے موسم کی طرح

کون کہے یہ رنج نظر کا کب جا کر کم ہونا ہے

بادل نے جہاں بھی کہیں بے نم ہمیں دیکھا

کام بہت سارے ہیں، فرصت کم لگتی ہے

کبھی وُہ رُخ بھی سپردِ قلم کیا جائے

زیست کا اِک اور دن کم ہو گیا

ہو ترا کرم اَب کے

خُدا سمجھتے رہے تھے جِسے صنم نکلا

خُشکیاں اپنے یہاں کی اور ہیں، نم اور ہے

شاعری