بیدار

غیروں کی محتاج مگر سرکار یہاں

ماجد صدیقی ۔ غزل نمبر 81

گھر گھر رسماً زر کے ہیں انبار یہاں

غیروں کی محتاج مگر سرکار یہاں

رکھیں گرم فقط جیبیں کارندوں کی

ٹیکس بچائیں کیا کیا ٹیکس گزار یہاں

نرخ بڑھائیں وزن کریں کم چیزوں کے

ہوتا ہے یوں دُگنا کاروبار یہاں

بندشِ آب و ضیا پر ہر سو ہنگامے

سانس تلک لینا بھی ہوا دشوار یہاں

نسل بڑھائیں پودا اک بھی لگا نہ سکیں

بس اِک حد تک ہیں سارے ہُشیار یہاں

وہ جو ملا تھا وہ تو گنوا بیٹھے ہیں ہم

اُس سا ملے اب، کب دُرّ شہوار یہاں

ماجد جو بھی کہے کچھ کہہ دے سوتے میں

تجھ سی بہم کس کو چشمِ بیدار یہاں

ماجد صدیقی

جون 3, 2013 0

جرعۂ قرب سے اُس کے گئے آزار بہت

ماجد صدیقی ۔ غزل نمبر 76

لطفِ باہم سے ہوئے وصل میں سرشار بہت

جرعۂ قرب سے اُس کے گئے آزار بہت

شخص و ناشخص کی پُرسش کا نشانہ ٹھہرے

ہم کہ کرتے رہے ہر درد کا پرچار بہت

خاک سے مہرِ سرِ حشر کرے ہے پیدا

آج کے دَور کا انسان ہے بیدار بہت

آخر اُس کو بھی ہمیں سی ہے تُفِ گرد ملی،

تھے بہم شاخِ شگفتہ کو بھی شہکار بہت

کھول کر رکھ گئی ہر راز، شد و بودِ حباب

ہم کو تسلیمِ حقیقت سے تھا انکار بہت

ہے کہاں رفعتِ فن، شرطِ ستائش ماجدؔ

وہی فنکار ہے جس کے ہیں طرفدار بہت

ماجد صدیقی

جون 3, 2012 0

دِل کہ بیگانۂ راحت ہے کسے یار کرے

ماجد صدیقی ۔ غزل نمبر 25

جس کو چھیڑے سرِ محفل وہی بیزار کرے

دِل کہ بیگانۂ راحت ہے کسے یار کرے

سرِ مقتل ہے یہی حرفِ ملامت کافی

کام باقی ہی رہا کیا ہے جو تلوار کرے

دل ہے میرا کہ پرندہ کوئی جوئندۂ آب

خواب میں کون یہ ہر شب مجھے بیدار کرے

ہم رُکے ہیں کہ یہی ڈور میّسر تھی ہمیں

اور ہوا ہے کہ اُڑانے ہی پہ اصرار کرے

آدمی بھی کہ ہے زندانِ تمّنا کا اسِیر

کام جو کرنا نہ چاہے وہی ناچار کرے

لوگ ہیں سطح پہ کائی کے بھی قائل ماجدؔ

تو ہی پاگل ہے جو ہر دَرد کا اظہار کرے

ماجد صدیقی

جون 3, 2012 0

موسمِ گل میں بھی پت جھڑ کے ہیں آثار وہی

ماجد صدیقی ۔ غزل نمبر 18

تندئ باد وہی، گرد کی یلغار وہی

موسمِ گل میں بھی پت جھڑ کے ہیں آثار وہی

عدل کے نام پہ ہم سے تھی جو نُچوائی گئی

فرقِ نا اہل پہ اب کے بھی ہے دستار وہی

حلقۂ رقصِ صبا میں تو ہے شامل لیکن

پہلوئے گل میں ہیں پیوست ابھی خار وہی

مطمئن کیا ہو کوئی غسلِ مناظر سے کہ ہے

کربِ آشوب وہی دیدۂ بیدار وہی

ہے لپک اب بھی وہی دستِ طلب میں کہ جو تھی

با ثمر شاخ کے ہونٹوں پہ ہے انکار وہی

اب بھی اِک حد سے پرے شوق کے پر جلتے ہیں

عجزِ سائل ہے وہی شوکتِ دربار وہی

رُت کُھلی پر نہ معافی کو ملا اذنِ کشود

پیرہن ہے تنِ ہر حرف پہ ناچار وہی

کلبلائے تو اسے اتنا تو کرنے دیجے

دل جسے بعدِ جراحت بھی ہے آزار وہی

اب بھی چہروں سے غمِ دل نہیں کُھلتا ماجدؔ

اب بھی پندار کو ہے کلفتِ اظہار وہی

ماجد صدیقی

جون 3, 2012 0

حرفِ حق جب بھی کہو جان کا آزار بنے

ماجد صدیقی ۔ غزل نمبر 15

پا بہ زنجیر کرے، طوق بنے، دار بنے

حرفِ حق جب بھی کہو جان کا آزار بنے

مسکراتا ہے اُسے دیکھ کے ہر اہلِ ہوس

جب کوئی لفظ گریباں کا مرے، تار بنے

تھا نہ یاروں پہ کچھ ایسا بھی بھروسہ لیکن

اَب کے تو لوگ سرِ بزم یہ اغیار بنے

کیا توقّع ہو بھلا لطفِ مناظر سے کہ آنکھ

کربِ آشوب سے ہی دیدۂ بیدار بنے

ہاں مرے جُرم کی کچھ اور بھی تشہیر کرو

کیا خبر، جشن مری موت کا تہوار بنے

کیا کہُوں جس کے سبب لائقِ تعزیز ہُوں مَیں

حرفِ بے نام وہی چشمۂ انوار بنے

ہم کہ محسُود ہیں اِس فکر کی ضَو سے ماجدؔ

جانے کب نورُ یہی اپنے لئے نار بنے

ماجد صدیقی

جون 3, 2012 0

اور پیرایہ نہ تھا اظہار کا

ماجد صدیقی ۔ غزل نمبر 11

ترجماں لرزہ تھا بس بیمار کا

اور پیرایہ نہ تھا اظہار کا

یہ چلن اب نِت کا ہے، اخبار کا

اِک نہ اِک لائے بگولہ نار کا

استطاعت ہو تو پڑھ لو ہر کہیں

رُخ بہ رُخ اِک نرخ ہے بازار کا

تاب کیا کیا دے گیا ابلیس کو

اِک ذرا سا حوصلہ انکار کا

ہم کہ ہیں ہر پل سکوں نا آشنا

ہے یہ فتنہ دیدۂ بیدار کا

ہو سخن ماجِد کا یا خلقِ خُدا

حال مندا ہے ہر اِک شہکار کا

ماجد صدیقی

جون 2, 2011 0

دیکھ اعلان یہی آج کے اخبار میں ہے

ماجد صدیقی ۔ غزل نمبر 79

مُبتلا عدل بھی اب جبر کے آزار میں ہے

دیکھ اعلان یہی آج کے اخبار میں ہے

ابر تا دیر نہ اَب بانجھ رہے گا شاید

حبس کا رنگ یہی موسمی آثار میں ہے

اَب کے اِس جال سے مشکل ہی سے نکلے شاید

صُبحِ اُمید کہ دامانِ شب تار میں ہے

ہر کہیں شور بھی، چیخیں بھی اُٹھیں گی لیکن

کُونج وُہ جس کو بچھڑنا ہے ابھی ڈار میں ہے

آگہی کرب ہے اور اِس کا مداوا مشکل

خار پیوست عجب دیدۂ بیدار میں ہے

کیا خبر صدق سے بر آئے بالآخر ماجدؔ!

یہ جو موہوم سی اُمید دلِ زار میں ہے

ماجد صدیقی

جون 2, 2010 0

اچّھا ہے یہی آج کا اخبار نہ دیکھا

ماجد صدیقی ۔ غزل نمبر 76

منصور حقیقت کا سرِ دار نہ دیکھا

اچّھا ہے یہی آج کا اخبار نہ دیکھا

ہر فرد کو اِس عہد میں آزارِ بقا ہے

ہے کون جِسے مرگ سے دوچار نہ دیکھا

اِس دورِ منّور میں سرِ ارض ہے جیسا

انسان کو ایسا کبھی خونخوار نہ دیکھا

خدشوں نے جہاں دی نہ مری آنکھ بھی لگنے

اُس شہر کا اِک شخص بھی بیدار نہ دیکھا

ہوتا ہے ہر اِک پھُول مہک بانٹ کے جیسا

انسان کو ایسا کبھی سرشار نہ دیکھا

اک بار جو لاحق ہو دل و جان کو ماجدؔ

جاتا ہوا وُہ روگ، وُہ آزار نہ دیکھا

ماجد صدیقی

جون 2, 2010 0

جینے کا ہر لمحہ شب آثار لگا ہے

ماجد صدیقی ۔ غزل نمبر 64

قلب و نظر کو جانے کیا آزار لگا ہے

جینے کا ہر لمحہ شب آثار لگا ہے

انساں بھی آواز نہ یُوں لوٹائے، جیسے

پتّھر پتّھر جنگل کا غم خوار لگا ہے

اُس کو جانے رات گئے کیا فکر لگی تھی

بستی بھر میں چور ہی اِک بیدار لگا ہے

صَرف ہوا ہے جو بھی بحقِ پست مقاماں

حرف وُہی اپنا دُرِّ شہوار لگا ہے

اِک اِک ذہن تھا ایک ہی روگ کی زد میں جیسے

شہر کا شہر ہی اِک جیسا بیمار لگا ہے

ماجدؔ شہر میں ہر سُو جیسے سب اچّھا تھا

جس کو دیکھا سرکاری اخبار لگا ہے

ماجد صدیقی

جون 2, 2010 0

کس نے اتنی رات گئے بیدار کیا

ماجد صدیقی ۔ غزل نمبر 40

خدشوں نے پھر ذہن پہ جیسے وار کیا

کس نے اتنی رات گئے بیدار کیا

وسعتِ شب کو بڑھتا دیکھ کے ہم نے بھی

اپنا اک اک حرف سحر آثار کیا

موسم گل میں گلشن سے جو آئے تھے

اُن جھونکوں نے اور بھی کچھ بے زار کیا

آخر اک دن ناز عجائب گھر کا بنے

ہم نے جن تختوں پر دریا پار کیا

کچھ بھی نہیں جس گھر میں اُس کے تحفّظ نے

گھر والوں کو اور بھی ہے نادار کیا

ماتھے پر مزدور کے دیکھ، مشقّت نے

کن شفاف نگینوں سے سنگھار کیا

ماجدؔ سمت سفر کی ٹیڑھی تھی ورنہ

چلنے سے کب ہم نے تھا انکار کیا

ماجد صدیقی

جون 2, 2010 0

پہلے سے بھی بڑھ کر کہیں بیزار کرے ہے

ماجد صدیقی ۔ غزل نمبر 24

جو شخص بھی ہم سے کوئی اقرار کرے ہے

پہلے سے بھی بڑھ کر کہیں بیزار کرے ہے

وُہ سُود بھی ذمّے ہے ہمارے کہ طلب جو

درباں تری دہلیز کا ہر بار کرے ہے

ممکن ہی کہاں بطن سے وُہ رات کے پھُوٹے

چہروں کو خبر جو سحرآثار کرے ہے

دیتے ہیں جِسے آپ فقط نام سخن کا

گولہ یہ بڑی دُور تلک مار کرے ہے

ہر چاپ پہ اٹُھ کر وُہ بدن اپنا سنبھالے

کیا خوف نہ جانے اُسے بیدار کرے ہے

پہنچائے نہ زک اور تو کوئی بھی کسی کو

رُسوا وُہ ذرا سا سرِ بازار کرے ہے

کس زعم میں ماجدؔ سرِ دربار ہمیں تُو

حق بات اگلوا کے گنہگار کرے ہے

ماجد صدیقی

جون 2, 2010 0

پات پہ جیسے چیونٹی دریا پار کرے

ماجد صدیقی ۔ غزل نمبر 3

آس ہمیں بھی کچھ ایسا ہی خوار کرے

پات پہ جیسے چیونٹی دریا پار کرے

جُگ بیتے ایسا ہی ہوتا آیا ہے

دل میں جس کے چور ہو پہلے وار کرے

دیکھ کے چابک راکب کا، چل پڑنے سے

مرکب میں کب تاب کہ وُہ انکار کرے

بادل جُھک کر اِک دو بوندیں برسا کر

اور بھی افزوں صحرا کا آزار کرے

ہم وُہ گھوڑے بیچ کے سونے والے ہیں

اَب کوئی بھونچال جنہیں بیدار کرے

عرضِ سخن پر ماجدؔ داد خسیسوں کی

کسب ہُنر تک سے جیسے بیزار کرے

ماجد صدیقی

جون 2, 2010 0

شہر میں اب اِس بیماری سے بچنا ہے دشوار بہت

ماجد صدیقی ۔ غزل نمبر 134

نطق سلامت ہے تو مہلک جرثوموں کے وار بہت

شہر میں اب اِس بیماری سے بچنا ہے دشوار بہت

اُس چنچل کے ہاتھوں جن پر رہ رہ کر تھی اوس پڑی

جانے پھر کیوں رہنے لگے ہیں وہ جذبے بیدار بہت

نازک وقت پہنچنے پر قائم نہ کسی کا بھی تھا بھرم

جتنی تمنّائیں تھیں دل میں نکلیں وہ نادار بہت

دونوں جرم کے منوانے پر اور نہ ماننے پر تھے تُلے

ہم کہ ہمیں اصرار بہت تھاوہ کہُانہیں انکار بہت

اور تأثر دے کر جس نے میرا خون غلاف کیا

وقت کے ہاتھوں دھل کر چمکی آخر وہ تلوار بہت

وہ قاصد دربانِ درِ محبوب سا جو محتاط رہے

دیدنی ہیں اُس قاصد جیسے نت چھپتے اخبار بہت

ایک ہی بات ہے پنکھ کٹیں یا چونچ پہ مُہر لگے ماجدؔ

مہجوروں کی خاطر ہیں اِس گلشن میں آزار بہت

ماجد صدیقی

جون 2, 2007 0

نہیں لیکن لبِ اظہار رکھنا

ماجد صدیقی ۔ غزل نمبر 89

سلگنا جان میں آزار رکھنا

نہیں لیکن لبِ اظہار رکھنا

عقیدت کے چڑھاوے چاہئیں تو

بڑے مخصوص سے اطوار رکھنا

کرم بھی ہو جو محتاجوں پہ کرنا

اُنہیں پہلے ذرا بے زار رکھنا

تأثر مہربانی کا نظر میں

خشونت کے بھی ساتھ آثار رکھنا

ہر اِک منظر نیا دوزخ بنے گا

یہاں مت دیدۂ بیدار رکھنا

اماں کو، پنجۂ انسان سے بھی

پڑے ہیں آہنی اوزار رکھنا

بڑا مشکل ہے اَب ماجدؔ چمن میں

سلامت اپنے برگ و بار رکھنا

ماجد صدیقی

جون 2, 2007 0

جُگ بیتے ہیں بستی کو بیدار ہوئے

ماجد صدیقی ۔ غزل نمبر 41

لٹ جانے کے خدشوں سے دو چار ہوئے

جُگ بیتے ہیں بستی کو بیدار ہوئے

شہرِ ستم میں حرص و ہوا کی سازش سے

کیا کیا اہلِ نظر، وقفِ دربار ہوئے

شاخ پہ کونپل بننے اور کھِل اٹھنے کے

کیا کیا سپنے آنکھوں کا آزار ہوئے

باغ میں جانے اور مہک لے آنے کے

بادِ صبا سے کیا کیا قول اقرار ہوئے

دریا میں منجدھار ہی دشمنِ جان نہ تھی

اور بھی کچھ دھاوے ہم پر اُس پار ہوئے

راہبری کا ماجد! قحط کہاں ایسا

جیسے اب ہیں، ہم کب یُوں نادار ہوئے

ماجد صدیقی

جون 1, 2006 0

پر نمایاں تری آمد کے نہ آثار ہوئے

ماجد صدیقی ۔ غزل نمبر 8

پھُول انوار بہ لب، ابر گہر بار ہوئے

پر نمایاں تری آمد کے نہ آثار ہوئے

کچھ سزا اِس کی بھی گرہے تو بچیں گے کیسے

ہم کہ جو تُجھ سے تغافل کے گنہگار ہوئے

ہونٹ بے رنگ ہیں، آنکھیں ہیں کھنڈر ہوں جیسے

مُدّتیں بِیت گئیں جسم کو بیدار ہوئے

وُہ جنہیں قرب سے تیرے بھی نہ کچھ ہاتھ لگا

وُہی جذبات ہیں پھر درپئے آزار ہوئے

جب بھی لب پر کسی خواہش کا ستارا اُبھرا

جانے کیا کیا ہیں اُفق مطلعٔ انوار ہوئے

اب تو وا ہو کسی پہلو ترے دیدار کا در

یہ حجابات تو اب سخت گراں بار ہوئے

چھیڑ کر بیٹھ رہے قصّۂ جاناں ماجدؔ

جب بھی ہم زیست کے ہاتھوں کبھی بیزار ہوئے

ماجد صدیقی

جون 1, 2004 0

ہر شخص سے پوچھیں ہمیں آزار ہے کیسا

ماجد صدیقی ۔ غزل نمبر 85

ہونٹوں پہ نہ لائیں یہ سخن ’’یار ہے کیسا‘‘

ہر شخص سے پوچھیں ہمیں آزار ہے کیسا

نیلام تو اُٹھ لے ابھی کھل جائے گا سب کچھ

ہم کون ہیں اور مصر کا بازار ہے کیسا

بھّٹی میں شراروں کی چمن سینچ رہا ہے

اس دور کا انسان بھی بیدار ہے کیسا

انصاف کی میزان کا بَل خود یہ بتائے

عشّاق کا احوال سرِ دار ہے کیسا

ایقان ہی جب اُن پہ تمہارا نہیں ماجدؔ

پھر کرب و الم کا تمہیں اقرار ہے کیسا

ماجد صدیقی

جون 1, 2003 0

مشتہر کرتے ہیں جنسِ دختراں اخبار میں

ماجد صدیقی ۔ غزل نمبر 56

یہ اضافہ بھی ہُوا ماں باپ کے آزار میں

مشتہر کرتے ہیں جنسِ دختراں اخبار میں

آبلہ پائی نے کر دی ہے مسافت یوں تمام

پیر چپکے رہ گئے ہیں جادۂ پر خار میں

تن بدن سے کھال تک جیسے ادھڑ جانے لگے

جیب ہی ہلکی نہیں ہوتی ہے اب بازار میں

سخت مشکل ہے کوئی تریاق اُس کا مِل سکے

زہر جو شامل ملے، ذی جاہ کے انکار میں

خلق ناداری کے ہاتھوں جان دینے پر مصر

اور زر کی بانٹ کے جھگڑے ادھر دربار میں

کیا کہیں ہر آن ماجد مضطرب، پڑنے کو ہیں

سنگ ریزے کیا سے کیا ہر دیدۂ بیدار میں

ماجد صدیقی

جون 1, 2002 0

لا دوا ہونے لگے آزار میرے شہر کے

ماجد صدیقی ۔ غزل نمبر 7

جب سے اندر سے بِکے اخبار میرے شہر کے

لا دوا ہونے لگے آزار میرے شہر کے

اَنٹیوں کے مول بِکتے ہیں کئی یوسف یہاں

مصر کے بازار ہیں بازار، میرے شہر کے

لُوٹ کر شب زادگاں نے جگنوؤں کی پُونحیاں

چہرہ چہرہ مَل لئے انوار، میرے شہر کے

جانچیے تو لوگ باہم نفرتوں میں غرق ہیں

دیکھیے تو فرد ہیں تہوار، میرے شہر کے

کُو بہ کُو پسماندگی کا ہے تعفّن چار سو

اور بہت ذی شان ہیں دربار، میرے شہر کے

چوس لینے پر نمِ زر، جس کسی کے پاس ہے

کر چکے ایکا سبھی زر دار، میرے شہر کے

مکر کیا کیا لوریاں ماجد اُنہیں دینے لگا

لوگ جتنے بھی مِلے بیدار، میرے شہر کے

ماجد صدیقی

جون 1, 2002 0

یہاں اہلِ نظر تو ہیں بہت، بیدار کم کم ہیں

ماجد صدیقی ۔ غزل نمبر 6

جو آنکھیں دیکھتی ہوں دھُند کے اُس پار، کم کم ہیں

یہاں اہلِ نظر تو ہیں بہت، بیدار کم کم ہیں

بھسم کرنے کو آہن، کام میں لایا گیا کیا کیا

فلاحت اور زراعت کے مگر اوزار کم کم ہیں

سمجھ بیٹھے ہیں جب سے اصلِ حرصِ خوش خصالاں ہم

کسی بھی صورتِ حالات سے بے زار کم کم ہیں

شکم جب سے بھرا رہنے لگا ہے چھِینا جھپٹی سے

وہ کہتے ہیں یہی ، نگری میں اب نادار کم کم ہیں

فروغِ تیرگی بھی دم بہ دم ماجِد فراواں ہے

نگر میں جگنوؤں کے پاس بھی انوار کم کم ہیں

ماجد صدیقی

جون 1, 2002 0

اِنساں تھے ، سرِ کوہ کے اشجار نہیں تھے

ماجد صدیقی ۔ غزل نمبر 4

ٹھہرے جو بھسم ، مِلکِ ستم گار نہیں تھے

اِنساں تھے ، سرِ کوہ کے اشجار نہیں تھے

اب کے بھی پرندے وُہی ، ژالوں میں سڑے ہیں

جو ابر کی خصلت سے خبردار نہیں تھے

الزام محافظ پہ بھی تھا کچھ تو ، نقب کا

افراد اگر شہر کے بیدار نہیں تھے

رکھتے تھے مہک پاس جو ماجد کے ہنر کی

جھونکے تھے ، کچھ اُس کے وہ طرفدار نہیں تھے

ماجد صدیقی

جون 1, 2002 0

ماجد صدیقی

شاعرِ بے مثال ماجد صدیقی مرحوم ۔ شخصیت اور شاعری

ٹیگ

غیروں کی محتاج مگر سرکار یہاں

جرعۂ قرب سے اُس کے گئے آزار بہت

دِل کہ بیگانۂ راحت ہے کسے یار کرے

موسمِ گل میں بھی پت جھڑ کے ہیں آثار وہی

حرفِ حق جب بھی کہو جان کا آزار بنے

اور پیرایہ نہ تھا اظہار کا

دیکھ اعلان یہی آج کے اخبار میں ہے

اچّھا ہے یہی آج کا اخبار نہ دیکھا

جینے کا ہر لمحہ شب آثار لگا ہے

کس نے اتنی رات گئے بیدار کیا

پہلے سے بھی بڑھ کر کہیں بیزار کرے ہے

پات پہ جیسے چیونٹی دریا پار کرے

شہر میں اب اِس بیماری سے بچنا ہے دشوار بہت

نہیں لیکن لبِ اظہار رکھنا

جُگ بیتے ہیں بستی کو بیدار ہوئے

پر نمایاں تری آمد کے نہ آثار ہوئے

ہر شخص سے پوچھیں ہمیں آزار ہے کیسا

مشتہر کرتے ہیں جنسِ دختراں اخبار میں

لا دوا ہونے لگے آزار میرے شہر کے

یہاں اہلِ نظر تو ہیں بہت، بیدار کم کم ہیں

اِنساں تھے ، سرِ کوہ کے اشجار نہیں تھے

شاعری