تلاش

ماجد صدیقی

شاعرِ بے مثال ماجد صدیقی مرحوم ۔ شخصیت اور شاعری

ٹیگ

بانہواں

ٹوٹے ٹوٹے ہو ہو گئے نیں ، چھتر سنگھنیاں چھاواں دے

ماجد صدیقی (پنجابی کلام) ۔ غزل نمبر 68
شاخاں نوں انج ننگیاں کر گئے ناخن تیز ہواواں دے
ٹوٹے ٹوٹے ہو ہو گئے نیں ، چھتر سنگھنیاں چھاواں دے
کدھرے تے نئیں سانبھیا جاندا، پانی نالیاں آڈاں توں
کدھرے سُک سُک تراماں ہوئے نیں، سینے اَیڈ تلاواں دے
سُکھ دی نیندر سَون نہ دیندا، چور اساڈے اندر دا
کنّے ائی سِر کڈھویں قدنیں بھانویں، شہر پناہواں دے
اپنی پَنڈوں ہتھ ہٹایاں، پینڈا کھوٹا لگدا اے
مِتراں نوں وی بھچ نہ سکن، اج کلاوے بانہواں دے
ویلے توں پہلاں ائی ماجِد! اَینہن نے کٹیا اوہناں نوں
جیہڑے پَتر ٹہنیاں تے سن، کھلرے ہتھ دعاواں دے
ماجد صدیقی (پنجابی کلام)

دُھپاں پاروں سڑ سڑ جاون سِکدے تار نگاہواں دے

ماجد صدیقی (پنجابی کلام) ۔ غزل نمبر 30
تھانویں تھانویں جال نیں تانبے وانگر تپدیاں راہواں دے
دُھپاں پاروں سڑ سڑ جاون سِکدے تار نگاہواں دے
اوہ اوہ دھارن دُکھ درداں دی ایس اُتے پئی تُلدی اے
دھاگے تیکن اُدھڑن لگ پئے جِند تکڑی دیاں کانہواں دے
عرشاں تیکن کدے نہ جاون دل چوں اُٹھیاں گّلاں وی
پُج کے وچ فضاواں دے پھٹ جان غبارے آہواں دے
پھانڈے‘ دُھوڑاں‘ پھنڈ پھنڈ دَسّن فریاداں دیاں فصلاں نُوں
اِین منا نئیں سکدے کوئی ہُن اُلار وی بانہواں دے
غرضاں پاروں اُنج ائی اُچّی اُچّی ڈَونڈی پِٹدے نیں
نِیویاں بندیاں کولوں سمجھے جان مزاج نہ شاہواں دے
کوئی وی پریت پروہنا گھّلے کاگ نہ پہلاں آون توں
کھُر گئے نقش نگاہوں سارے بھُلیاں وِسراں چاہواں دے
وگدیاں واواں اندر وی جد زہر جیہی پئی گھُلدی اے
ماجدُ کون دِلاوے سانوں آن، وساہ ہُن سانہواں دے
ماجد صدیقی (پنجابی کلام)

Create a free website or blog at WordPress.com.

Up ↑