اصنام

حصّۂ جان بھی اپنا میں ترے نام کروں

ماجد صدیقی ۔ غزل نمبر 22

تو میسّر ہو کسی شب تو یہ اقدام کروں

حصّۂ جان بھی اپنا میں ترے نام کروں

حرفِ روشن، تری اُمیدِ ملاقات ایسا

میں حمائل بہ گلُو کیوں نہ سرِ شام کروں

پر سلامت ہیں تو زخموں کو لئے ہر جانب

قصّۂ ضربتِ صیّاد بھی اب عام کروں

ساعتِ نحس جو غالب مرے حالات پہ ہے

ایسی آفت کو اکیلے میں کہاں رام کروں

قائلِ صنعتِ آذر ہوں ہنرمند ہوں میں

میں جو کرتا ہوں تو یوں مدحتِ اصنام کروں

مجھ کو درپیش مسافت ہے رُتوں کی ماجدؔ

سایۂ گل میں جو پہنچوں تو اب آرام کروں

ماجد صدیقی

جون 3, 2012 0

وقت سمٹا تو ہمیں کام بہت یاد آئے

ماجد صدیقی ۔ غزل نمبر 45

ایک آغاز تھا انجام بہت یاد آئے

وقت سمٹا تو ہمیں کام بہت یاد آئے

کچھ تو ایسے تھے جنہیں بھول کے تسکین ملی

اور کچھ لوگ بہ ہر گام بہت یاد آئے

وہ نہ جو ٹوہ میں روزی کی نکل کر لوٹے

چہچہے اُن کے سرِشام بہت یاد آئے

مول جب اپنا پڑا شہر کے بازاروں میں

وہ جو یوسف کے لگے دام، بہت یاد آئے

خود ہی نکلے تھے نکالے نہ گئے جو اُس سے

کعبۂ دِل کو وہ اصنام بہت یاد آئے

دیکھ کر ندّیاں جذبوں کی اترتی ماجِد

تھے کبھی دل میں جو کہرام، بہت یاد آئے

ماجد صدیقی

جون 3, 2011 0

ماجد صدیقی ۔ غزل نمبر 35

جگنو جگنو حرف نِکھارے روشن پھر بھی نام نہیں

پل پل ترسے آنکھ جِسے وُہ چاند کنارِ بام نہیں

پانی کی پھنکار یہی ہے تو کب خیر کناروں کی

دریا زور دکھائے گا یہ محض خیالِ خام نہیں

کس کسکے ہونٹوں پر پرکھیں روشن حرف دکھاوے کے

شہر میں ایسا کون ہے جس کی بغلوں میں اصنام نہیں

خوشوں ہی میں سحر ہے وُہ جو پر نہ مکّرر کُھلنے دے

فصلوں پر پھیلانے کو اب ہاتھ کسی کے دام نہیں

ایک سی چُپ ہر سمت ہے چاہے سانپ نگل لے چڑیا کو

کچھ ہو جائے ہونے کو برپا ہی کہیں کہرام نہیں

اَب وُہ دَور ہے برسوں جس میں اسکے سِکے چلتے ہیں

آج کے مشکیزوں میں ماجدؔپہلے جیسا چام نہیں

ماجد صدیقی

ماجد صدیقی

شاعرِ بے مثال ماجد صدیقی مرحوم ۔ شخصیت اور شاعری

ٹیگ

حصّۂ جان بھی اپنا میں ترے نام کروں

وقت سمٹا تو ہمیں کام بہت یاد آئے

پل پل ترسے آنکھ جِسے وُہ چاند کنارِ بام نہیں

شاعری