آسمانی

ماجد صدیقی ۔ غزل نمبر 71

ہمیں کاہے کو ہر پل پت جھڑوں سے بدگمانی ہے

نظر کیونکر نہ رکھیں اُس پہ جو رت بھی سہانی ہے

تعفّن آشنا ٹھہرے نہ ہو نابُود نظروں سے

وہ پانی خاک پر جس کو بہم پیہم روانی ہے

سحر کا دوپہر کا اور زوالِ شام کا منظر

تری ہو یا مری سب کی بس ایسی ہی کہانی ہے

حضور اپنے جو ہم جنسوں سے نت سجدے کراتا ہے

زمینی مت کہو اُس کو وہ حضرت آسمانی ہے

کسی کے جھوٹ کو تم جھوٹ ثابت کرکے دیکھو تو

سنو پھر اس سے کیا کیا پاس اُس کے گلفشانی ہے

وہ کنجشک و کبوتر ہو کہ ماجِد فاختہ اُس کے

پر و بازو میں لرزہ امن خواہی کی نشانی ہے

ماجد صدیقی

ماجد صدیقی ۔ غزل نمبر 1

ابر بردوشِ ہوا رہ کر بھی پانی ہو گیا

اور مقیّد ہو کے نہروں کی روانی ہو گیا

لطفِ باراں سے، شگفتِ گُل سے جو منسوب تھا

ہاں وہی مضموں ادا میری زبانی ہو گیا

وہ کہ کہلاتا رہا تھا لالۂ صحرا کبھی

رنگ و خوشبو کی کشش سے میرا جانی ہو گیا

اُس نے اہلِ خاک سے پھر رابطہ رکھا نہیں

جس کو کچھ رفعت ملی وہ آسمانی ہو گیا

خواب میں اکثر لگا ایسا کہ صبح جاگتے

میں بھی اوروں کی طرح قصّہ کہانی ہو گیا

کھو کے سارے رنگ گردآلود، زنگ آلود سا

دل بھی ہے گزرے زمانوں کی نشانی ہو گیا

ہاں وہی ماجِد کہ تھا صورت گرِ جذبات جو

مانتے ہیں سب کہ ہے بہزاد و مانی ہو گیا

ماجد صدیقی

ماجد صدیقی