سُرخ لبوں کی آگ

ہم سے لے جائیں تمہیں دُور زمانے والے

ماجد صدیقی ۔ غزل نمبر 34

ہیں اِسی بات پہ مسرور زمانے والے

ہم سے لے جائیں تمہیں دُور زمانے والے

دیکھنا رُو بہ نمو پھر شجر امید کا ہے

شاخ سے جھاڑ نہ دیں بُور زمانے والے

دستبردار ہوں چاہت ہی سے خود اہلِجنوں

یوں بھی کر دیتے ہیں مجبور زمانے والے

ٹھوکروں سے نہ سہی ضربِ نگاہِ بد سے

آئنہ دل کا کریں چُور زمانے والے

برق باغوں پہ گرے یا کوئی تارا ٹوٹے

کس نے دیکھے کبھی رنجورزمانے والے

ماجد صدیقی

جون 2, 2008 0

وہ لڑکی جو شرمیلے نینوں والی ہے

ماجد صدیقی ۔ غزل نمبر 33

ہم نے بھی اب نسبت اُس سے ٹھہرا لی ہے

وہ لڑکی جو شرمیلے نینوں والی ہے

جو درد گریزاں دل سے تھا وہ جا بھی چکا

کچھ روز سے اب پنجرہ پنچھی سے خالی ہے

احوالِدَرُوں چہرے سے نہیں کُھلنے دیتے

لو ہم نے بھی ہنس کھیل کے بات بنا لی ہے

لَو دیکھ کے شاید کوئی مسافر آ پہنچے

ہم نے بھی دشت کنارے آگ جلا لی ہے

اُس شوخ کا چہر ہ شوخ گلابوں جیساہے

اور کان میں پہلی کے چندا سی بالی ہے

ماجد صدیقی

جون 2, 2008 0

اِک نظر اے کاش مڑ کر دیکھتے

ماجد صدیقی ۔ غزل نمبر 32

ہم تمہیں مہ کے برابر دیکھتے

اِک نظر اے کاش مڑ کر دیکھتے

جھانکتے اِک بار گر تم بام سے

دل میں برپا ہم بھی محشر دیکھتے

ہاں تمہارا لمس گر ہوتا بہم

سرسراتی ہاتھ میں زر دیکھتے

موج جیسے سبزۂ ساحل پہ ہو

تم ہمیں خود پر نچھاور دیکھتے

ماجد صدیقی

جون 2, 2008 0

تم بھی اے کاش! مرے بھاگ جگانے آتے

ماجد صدیقی ۔ غزل نمبر 31

ہمرہِ بادِ صبا پُھول کِھلانے آتے

تم بھی اے کاش! مرے بھاگ جگانے آتے

چاند کے قرب سے بے کل ہو سمندر جیسے

ایسی ہلچل مرے دل میں بھی مچانے آتے

جیسے بارش کی جگہ پُھول پہ شبنم کا نزول

تم بھی ایسے میں کسی اور بہانے آتے

رنگِرخسار سے دہکاتے شب و روز مرے

آتشِگل سے مرا باغ جلانے آتے

دینے آتے مجھے تم صبحِبہاراں کی جِلا

اور خوشبو سا رگ و پے میں سمانے آتے

ماجد صدیقی

جون 2, 2008 0

ٹل جائیں تجھ نگار سے ایسے بھی ہم نہیں

ماجد صدیقی ۔ غزل نمبر 30

ہم بدگماں ہوں پیار سے ایسے بھی ہم نہیں

ٹل جائیں تجھ نگار سے ایسے بھی ہم نہیں

پُھولوں تلک سفر ہی جب اپنا ہے مدّعا

ڈر جائیں خار زار سے ،ایسے بھی ہم نہیں

اک اور بھی جنم ہو تو دیکھیں گے رہ تری

ٹھٹکیں ہم انتظار سے ایسے بھی ہم نہیں

خُو ہے جو سر بلندیٔ سر کی ہمیں ۔۔ اِسے

بدلیں گے انکسار سے ایسے بھی ہم نہیں

جاناں !ترا وہ تیرِ نظر ہو کہ تیغِ غیر

جھجکیں کسی بھی و ار سے ،ایسے بھی ہم نہیں

ماجد صدیقی

جون 2, 2008 0

بِن ترے کیا کیا حسیں موسم گزر جانے لگے

ماجد صدیقی ۔ غزل نمبر 29

ندیّوں میں آسمانی رنگ بھر جانے لگے

بِن ترے کیا کیا حسیں موسم گزر جانے لگے

کِھلکھلاہٹ بھی وہی اور تمتماہٹ بھی وہی

پُھول تیرے عارضوں جیسے نکھر جانے لگے

تیری جانب تتلیوں جیسی لئے بے تابیاں

ہو کے پہلے سے زیادہ بارور جانے لگے

تشنۂ حسن اِک نظر، اور اِک دلِ ذی حوصلہ

لے کے ہم بھی ساتھ کیا رختِسفر جانے لگے

تو نہ ہو رنج آشنا جانا ں! ہمارے قرب سے

حق میں تیرے دیکھ !ہم کیا کیا نہ ڈر جانے لگے

ماجد صدیقی

جون 2, 2008 0

ہنس ہنس کر تم ہی نے پُھول کھلانے ہیں

ماجد صدیقی ۔ غزل نمبر 28

موسمِ گل کے رنگ تو آنے جانے ہیں

ہنس ہنس کر تم ہی نے پُھول کھلانے ہیں

ہم نے پانے کو تیرے اقرار کی نم

کونجوں جیسے حرف زباں پر لانے ہیں

خوشبو کے مرغولے ،رنگت پُھولوں کی

بھنوروں کے ایسے ہی ٹھور ٹھکانے ہیں

تجھ سے ملنا اور پھر تیرا ہو جانا

ایک حقیقت ،باقی سب افسانے ہیں

قرب ترے کی، چھاؤں میں جا رُکنے کو

دشت کی آنچ میں ہم نے پنکھ جلانے ہیں

ماجد صدیقی

جون 2, 2008 0

رشک میں اُس شوخ کے اب کی ادائیں شوخ ہیں

ماجد صدیقی ۔ غزل نمبر 27

منظروں سپنوں ارادوں کی قبائیں شوخ ہیں

رشک میں اُس شوخ کے اب کی ادائیں شوخ ہیں

اُس کے دم سے سخت واماندہ ہیں خدشوں کے عقاب

اور سکون و امن کی سب فاختائیں شوخ ہیں

اُس کے ہونٹوں پر دمکتی مسکراہٹ دیکھ کر

آسماں پر ابر چنچل ہیں، ہوائیں شوخ ہیں

اُس بدن پر دیکھ کر پیہم مہکتا پیرہن

گل بہ گل بے نام خوشبو کی ردائیں شوخ ہیں

ہم سخن ہونے کو اُس ہر دم سراپا ناز سے

باغ میں کلیوں کے کِھلنے کی صدائیں شوخ ہیں

ماجد صدیقی

جون 2, 2008 0

مگر اک کٹھن سا سوال ہے تجھے دیکھنا

ماجد صدیقی ۔ غزل نمبر 26

مری آرزو کا مآل ہے تجھے دیکھنا

مگر اک کٹھن سا سوال ہے تجھے دیکھنا

کبھی ابر میں ،کبھی چاند میں، کبھی پُھول میں

سرِگردش مہ و سال ہے تجھے دیکھنا

رگ و پے میں گرچہ ہے چاشنی ترے قرب کی

تو مہک ہے کارِ محال ہے تجھے دیکھنا

کوئی عید بھی ہو سعید ہے ، تری دید کی

پئے چشم، کسبِکمال ہے تجھے دیکھنا

تجھے کیوں نہ میں یہ کہوں صنم کہ سرِ نظر

کسی اور رُت کا جمال ہے تجھے دیکھنا

ماجد صدیقی

جون 2, 2008 0

اور پھر وہ، کہ سنی تم نے زبانی میری

ماجد صدیقی ۔ غزل نمبر 25

کیوں رُلاتی نہ تمہیں پیار کہانی میری

اور پھر وہ، کہ سنی تم نے زبانی میری

طاقِنسیاں میں کہیں رکھ کے اُسے بھول گئے

ا نگلیوں میں جو سجائی تھی نشانی میری

آنچ سی دینے لگا ہجر کا صحرا جب سے

اور مرجھانے لگی عمر سہانی میری

برقِ فرقت کی گرج خوف دلاتی ہے یہی

راکھ کا ڈھیر نہ ہو جائے جوانی میری

مجھ کو دہرانے پہ مجبور نہ کرنا جاناں !

جاں سے جانے کی ہے جو ریت پرانی میری

ماجد صدیقی

جون 2, 2008 0

ہاتھوں سے دُور ہونے لگیں اُس جسم کی گولائیاں

ماجد صدیقی ۔ غزل نمبر 24

قوسیں مہکتے لمس کی رَس گھولتی رعنائیاں

ہاتھوں سے دُور ہونے لگیں اُس جسم کی گولائیاں

شاخوں سے جھڑتے پُھول سی، سر پرامڈتی دھول سی

حق میں ہمارے ہو چلیں، کیا کیا کرم فرمائیاں

ہر کُنج سے چھلکا کئے کیا کیا خزینے لطف کے

لپٹیں تھیں جیسے مشک کی اُس حسن کی پہنائیاں

اُس شوخ کے الطاف کی ،ہم سے نہ ناپی جاسکیں

دل کو جو ارزانی ہوئیں ،اُس درد کی گہرائیاں

ہم کو اکیلا چھوڑ کر، جب سے وہ چنچل جا چکا

ہر سمت اگنے لگ پڑیں، ڈستی ہوئی تنہائیاں

ماجد صدیقی

جون 2, 2008 0

یہ ستم مجھ پہ بار بار نہ کر

ماجد صدیقی ۔ غزل نمبر 23

غیر پر اتنا اعتبار نہ کر

یہ ستم مجھ پہ بار بار نہ کر

گل پریشاں ہُوا مہک کھو کر

حالِ دل تو بھی آشکار نہ کر

میں گیا وقت جا چکا ہوں ،مرے

لوٹ آنے کا انتظار نہ کر

ہم کہ ہیں چاہتوں کے متوالے

ہم سے اغماض اے نگار! نہ کر

تو کسی ایک ہی کا ہو کر رہ

خُو کوئی اور اختیار نہ کر

ماجد صدیقی

جون 2, 2008 0

لب پہ لانے لگی پھر سخن پیار کا، رقص کرتی ہوا

ماجد صدیقی ۔ غزل نمبر 22

سن ذرا اے صنم! گنگناتی ہے کیا، رقص کرتی ہوا

لب پہ لانے لگی پھر سخن پیار کا، رقص کرتی ہوا

چُھو کے تیر ا بدن تیری لہراتی زلفیں ترا پیرہن

تجھ سے کہتی ہے کیا کیا مرا مدّعا ،رقص کرتی ہوا

ساتھ لاتی ہے کیا کیا تم ایسے نہ گھونگھٹ بناتی ہوئی

تیرا رنگِ حیا تیرا رنگِ قبا رقص کرتی ہوا

ماجد صدیقی

جون 2, 2008 0

تیر سارے کماں کے چلا دیکھیے

ماجد صدیقی ۔ غزل نمبر 21

سخت جاں ہوں مجھے آزما دیکھیے

تیر سارے کماں کے چلا دیکھیے

جس میں مجھ کو ارادے جلانے کے ہیں

اُ س اگن کو بھی دے کر ہوا دیکھیے

میں نے کرنی تھی جاں، نذر کی ہے تمہیں

لعل ہے جو پہنچ میں گنوا دیکھیے

میرے حق میں ہیں جن جن کی بیداریاں

سب کے سب ایسے جذبے سُلا دیکھیے

جس سے شہرِرقیباں میں ہلچل مچے

حشر ایسا بھی کوئی اٹھا دیکھیے

ماجد صدیقی

جون 2, 2008 0

تم بھی جاناں! ذرا مسکرا دیجیے

ماجد صدیقی ۔ غزل نمبر 20

سبزہ و گل کو اپنا پتا دیجیے

تم بھی جاناں! ذرا مسکرا دیجیے

اس میں بھی بِن تمہارے کشش کچھ نہیں

موسمِ گل کو اتنا بتا دیجیے

دل میں پھر اَوج پر ہے تمہاری لگن

آگ بھڑکی ہے اِس کو ہوا دیجیے

میں نے گستاخ نظروں کو روکا نہیں

اِس بغاوت کی مجھ کو سزا دیجیے

لطف و راحت کے غنچے کِھلے جس قدر

ہجر کی آنچ سے سب جلا دیجیے

ماجد صدیقی

جون 2, 2008 0

لیکن جو ہو چکی وہ خطا مان جائیے

ماجد صدیقی ۔ غزل نمبر 19

سچّے ہو گر تو اور نہ آنکھیں چُرائیے

لیکن جو ہو چکی وہ خطا مان جائیے

کیو ں وقتِگفتگو ہے نگاہوں میں اضطراب

زیرِ زباں ہے جو وہ زباں پر بھی لائیے

میں پُھول بھی ہوں گر تو بگولوں کی زد پہ ہوں

میں کھو چکا حواس مرے منہ نہ آئیے

کھینچے جو اپنی سمت اُنہیں بھی جو دُور ہیں

ایسا بھی کوئی پُھول سرِ لب کِھلائیے

لَو دے اٹھے گلاب نہ آخر سرِحجاب

اس طور بھی نہ روئے درخشاں چھپائیے

ماجد صدیقی

جون 2, 2008 0

نجانے یہ دل جشن کیا کیا مناتا تم آئے تو ہوتے

ماجد صدیقی ۔ غزل نمبر 18

زرونقدِراحت تمہی پر لٹاتا تم آئے تو ہوتے

نجانے یہ دل جشن کیا کیا مناتا تم آئے تو ہوتے

گلے میں حمائل سجل ضَو کے ہالے، سرِبام چندا

جہاں بھر کو میں اپنی پونجی دکھاتا تم آئے تو ہوتے

کلی کی چٹک سی ،زمیں پر نئی بوندیوں کی کھنک سی

نرالی دھنیں میں لبوں پر سجاتا تم آئے تو ہوتے

مجھے کس طرح تم جلاتے بجھاتے رہے فرقتوں میں

تمہیں جَور اک اک تمہارا سُجھاتا تم آئے تو ہوتے

ان اشکوں کے آنکھوں سے فرطِمسرت میں جو پھوٹتے ہیں

نئے دیپ پلکوں پہ اپنی جلاتا تم آئے تو ہوتے

ماجد صدیقی

جون 2, 2008 0

پُھول کھلیں جب بھی بگھیا میں یاد بہت آتے ہو جاناں

ماجد صدیقی ۔ غزل نمبر 17

رنگ گُھلیں جب بھی پُروا میں یاد بہت آتے جو جاناں

پُھول کھلیں جب بھی بگھیا میں یاد بہت آتے ہو جاناں

اوس پڑی جب پُھولوں پر ہو، قوس دھنک کی پیشِنظر ہو

برکھا کی نمناک ہوا میں یاد بہت آتے ہو جاناں

تم کہ مہک کا اک جھونکا ہو تم کہ لپکتی موجِ صبا ہو

تنہائی جیسے صحرا میں، یاد بہت آتے ہو جاناں

کیف نیا دے جانے والے ،قرب کا لطف دلانے والے

موسم کی پرنور فضا میں یاد بہت آتے ہو جاناں

ہر سو ہیں خوشبو کے ریلے ،ہیں جس میں رنگوں کے میلے

عیش مناتی اس دنیا میں یاد بہت آتے ہو جاناں

ماجد صدیقی

جون 2, 2008 0

چاند چہرے کا ہوتا اگر ضَونشاں کچھ بگڑنا نہ تھا

ماجد صدیقی ۔ غزل نمبر 16

دیکھتے گر ذرا ہنس کے اے مہرباں کچھ بگڑنا نہ تھا

چاند چہرے کا ہوتا اگر ضَونشاں کچھ بگڑنا نہ تھا

دو قدم ہم چلے تھے اگر دو قدم تم بھی چلتے ادھر

اس سے ہونا نہیں تھا کسی کا زیاں،کچھ بگڑنا نہ تھا

حسن کی کھنکھناتی ندی جانے کیوں ہم سے کھنچتی رہی

گھونٹ دو گھونٹ پینا تھا آبِ رواں، کچھ بگڑنا نہ تھا

بندھنوں سے بغاوت، قیامت کا باعث نہ ٹھہری کبھی

جس طرح کا ہے، رہتا وہی آسماں کچھ بگڑنا نہ تھا

تھوکنے سے بھلا رُوئے مہتاب پر فرق پڑنا تھا کیا

کُھل گئی اِس طرح نیّتِ حاسداں کچھ بگڑنا نہ تھا

ماجد صدیقی

جون 2, 2008 0

آپ سے ہو گیا بھی اگر سامنا ہم نہ کچھ کہہ سکے

ماجد صدیقی ۔ غزل نمبر 15

دل میں اندوہ جتنا تھا دل میں رہا ہم نہ کچھ کہہ سکے

آپ سے ہو گیا بھی اگر سامنا ہم نہ کچھ کہہ سکے

منعکس ہو سکی ہم سے بس اِس قدر اپنی رودادِ دل

ایک قطرہ سا پلکوں سے ڈھلکا کیا ہم نہ کچھ کہہ سکے

دل کے اندر تھا جو کچھ وہ چہرے پہ مرقوم ہوتا رہا

حشر سا اک پسِچشم ولب تھا بپا ہم نہ کچھ کہہ سکے

نارسائی کی کثرت نے ہم کو دلائے حجاب اس قدر

چھیڑتی رہ گئی آنچلوں کی ہوا ہم نہ کچھ کہہ سکے

عذر کیا کیا زباں پر نہ لائے، دئیے کوسنے کیا سے کیا

آپ ہی نے ہمیں جو کہا سو کہا ،ہم نہ کچھ کہہ سکے

ماجد صدیقی

جون 2, 2008 0

میر ے ہونٹوں پہ رقصاں شرر دیکھنا

ماجد صدیقی ۔ غزل نمبر 14

دیکھنا دیکھنا اک نظر دیکھنا

میر ے ہونٹوں پہ رقصاں شرر دیکھنا

میری جانب سے ہے اِک کبوتر اڑا

اُس کی تم منتہائے سفر دیکھنا

دمبدم ہیں رواں جو تمہاری طرف

اور شل ہیں جو، وہ بال و پر دیکھنا

جان لینا اسے تم پیمبر مرا

ایک تارا قریبِ قمر دیکھنا

آنکھ مضطر ہے اور چاہتی ہے کوئی

جسم کی چاندنی کا نگر دیکھنا

ماجد صدیقی

جون 2, 2008 0

اُن میں بھی جو سخت تھے وہ دوستوں کے وار تھے

ماجد صدیقی ۔ غزل نمبر 13

درپئے آزار کچھ احباب کچھ اغیار تھے

اُن میں بھی جو سخت تھے وہ دوستوں کے وار تھے

گُرز جو ہم پر اُٹھا اپنے نشانے پر لگا

تیرچِلّے پر چڑھے جتنے جگر کے پار تھے

جان لیوا خامشی اُس کی تھی اور جو بول تھے

سب کے سب شاخِسماعت پرتبر کی دھار تھے

کھو کے اُس چنچل کی چاہت میں یہی ہم پر کھلا

اِک ذرا سا لطف، پھر آزار ہی آزار تھے

کیا سے کیا اُس شوخ کے ہاتھوں نہ سہنے پڑ گئے

جس قدر بھی جبر کے آداب تھے، اطوار تھے

ماجد صدیقی

جون 2, 2008 0

غیر کے روبرو مجھ سے رُوٹھا نہ کر

ماجد صدیقی ۔ غزل نمبر 12

چاہتا ہوں کہ تو مجھ سے رُوٹھا نہ کر

غیر کے روبرو مجھ سے رُوٹھا نہ کر

جان لے ،تیرے دم سے بقا ہے مری

عشق کی آبرو! مجھ سے رُوٹھا نہ کر

میں کہ ہوں دیپ، تو ہے شعائیں مری

پھیل کر چار سو مجھ سے رُوٹھا نہ کر

تو کہ چندا ہے چندا سے سُورج نہ بن

ہو نہ یوں تُندخو مجھ سے رُوٹھا نہ کر

میں کہ سبزہ ہوں ،نورس ہوں دم سے ترے

اے مری آبُجو! مجھ سے رُوٹھا نہ کر

ماجد صدیقی

جون 2, 2008 0

جاناں! تیر ا برتاؤ بھی جان لیا

ماجد صدیقی ۔ غزل نمبر 11

چہرے پر چہرہ ہم نے پہچان لیا

جاناں! تیر ا برتاؤ بھی جان لیا

اِس بالک کی ہٹ تو ہم کو لے بیٹھی

ہم نے دل کا جانا تھا آسان لیا

جتنے بھی پیغام ہوا نے پہنچائے

ہم نے اُن ساروں کو سچا مان لیا

اور بھلا اِس مشکل کا حل کیا ہوتا

یاد اُجالا چہرۂ شب پر تان لیا

تیرے حسن کا سونا ہاتھ نہیں آیا

ہم نے چاہت کا صحرا بھی چھان لیا

ماجد صدیقی

جون 2, 2008 0

دل کا ہر خواب سورج مکھی بن گیا پُھول کھلنے لگے

ماجد صدیقی ۔ غزل نمبر 10

جب کبھی میری جانب ترا رُخ پھرا پُھول کھلنے لگے

دل کا ہر خواب سورج مکھی بن گیا پُھول کھلنے لگے

چاپ میں تیرے قدموں کی پیغام تھا جانے کس کشف کا

تیری آمد کا جب بھی چلا ہے پتا پُھول کھلنے لگے

دیر اتنی تھی مائل ہوئی جب صبا تیرے الطاف کی

صحنِخواہش کے ہر کنج میں جا بجاپھول کھلنے لگے

پھر کہاں کی خزاں تیری خاموشیاں جب چٹکنے لگیں

دفعتاً سن کے سندیس و جدان کا پُھول کھلنے لگے

ماجد صدیقی

جون 2, 2008 0

حسن کے شہ نشیں، لطف کے آسماں دیکھ ایسا نہ کر

ماجد صدیقی ۔ غزل نمبر 9

تو کہ گل ہے نہ بھنوروں سا ہو بدگماں دیکھ ایسا نہ کر

حسن کے شہ نشیں، لطف کے آسماں دیکھ ایسا نہ کر

رکھ نہ ہم سے چھپا کر طراوت لب و چشم و رخسار کی

لے کے جائیں کہاں ہم یہ سُوکھی زباں دیکھ ایسا نہ کر

طوف سے سرو قامت کے کب تک ہمیں باز رکھے گا تو

دور رکھتا ہے پُھولوں سے کیوں تتلیاں دیکھ ایسا نہ کر

وہ ہمِیں ہیں جو اُتریں گے جاناں !ترے اوجِ معیار پر

کاوشِ شوق ہونے نہ دے رائیگاں دیکھ ایسا نہ کر

ماجد صدیقی

جون 2, 2008 0

بہ بزمِ غیر نہ آتے اگر بُرا کیا تھا

ماجد صدیقی ۔ غزل نمبر 8

بھرم مرا نہ گنواتے اگر بُرا کیا تھا

بہ بزمِ غیر نہ آتے اگر بُرا کیا تھا

تمہارے روٹھ کے جانے سے جو ہوا برپا

وہ حشر تم نہ اٹھاتے اگر بُرا کیا تھا

وہی جو تیر سی میرے بدن کو چیر گئی

وہ بات منہ پہ نہ لاتے اگر بُرا کیا تھا

تمہارے ہجرِمسلسل سے جو الاؤ بنی

اس آگ میں نہ جلاتے اگر بُرا کیا تھا

تم ہی تو تھے جو مرا دم تھے، دل کی دھٹرکن تھے

سفر میں ساتھ نبھاتے اگر بُرا کیا تھا

ماجد صدیقی

جون 2, 2008 0

جاناں! قریب آؤگھٹا بھی ہے مے بھی ہے

ماجد صدیقی ۔ غزل نمبر 7

بن کے نشہ سا چھاؤ گھٹا بھی ہے مے بھی ہے

جاناں! قریب آؤگھٹا بھی ہے مے بھی ہے

آنکھیں ملیں تو مستیاں پھیلیں چہارسو

موسم کو شہ دلاؤ گھٹا بھی ہے مے بھی ہے

جتنی بھی چھا چکی ہیں بدن پر رُتیں اُجاڑ

اُن پر نکھار لاؤ گھٹا بھی ہے مے بھی ہے

رہ جائے بُجھ کے قلب و نظر میں ہے جو بھی پیاس

گاؤ ملہار گاؤ ،گھٹا بھی ہے مے بھی ہے

بندش سی کیا یہ دِید پہ، باہم ملن پہ ہے

جادو کوئی جگاؤ گھٹابھی ہے مے بھی ہے

ماجد صدیقی

جون 2, 2008 0

پھول کیوں شاخ سے ٹوٹ جانے لگا سوچنا چاہیے

ماجد صدیقی ۔ غزل نمبر 6

باغ پر وقت کیسا یہ آنے لگا سوچنا چاہیے

پھول کیوں شاخ سے ٹوٹ جانے لگا سوچنا چاہیے

وہ کہ جو جھانکتا تھا بہاروں سے بھی چاند تاروں سے بھی

جذبۂ دل وہ کیسے ٹھکانے لگا سوچنا چاہیے

وہ کہ جو بندشوں سے بھی دبتا نہ تھا جو سنبھلتا نہ تھا

پھر وہی کیوں نظر میں سمانے لگا سوچنا چاہیے

ماجد صدیقی

جون 2, 2008 0

پتا پتا موسمِگل بھی بکھر جانے لگا

ماجد صدیقی ۔ غزل نمبر 5

اے صنم اب اور کس رُت میں ہے تُو آنے لگا

پتا پتا موسمِگل بھی بکھر جانے لگا

تُوبھی ایسی کوئی فرمائش کبھی ہونٹوں پہ لا

دیکھ بھنورا کس طرح پھولوں کو سہلانے لگا

تُوبھی ایسے میں مرے آئینۂ دل میں اتر

چند رماں بھی دیکھ پھر جھیلوں میں لہرانے لگا

میں بھلاکب اہل، تجھ سے یہ شرف پانے کا ہوں

تُو بھلا کیوں حسن کاہُن ،مجھ پہ برسانے لگا

عندلیبوں کو گلاب اور تُومجھے مل جائے گا

موسم گل، دیکھ! کیا افواہ پھیلانے لگا

ماجد صدیقی

جون 2, 2008 0

غیر سارے تمہیں یاد آنے لگے تم نے اچّھا کیا

ماجد صدیقی ۔ غزل نمبر 4

اپنے پیاروں کو جی سے بُھلانے لگے تم نے اچّھاکیا

غیر سارے تمہیں یاد آنے لگے تم نے اچّھا کیا

تم نے ان سب کو بھی اپنا دامن جھٹک کر پرے کر دیا

جن کو تم تک پہنچتے زمانے لگے تم نے اچّھا کیا

تم نے دیکھا نہ اہلِریا کون، اہلِ صفا کون ہیں

یہ حقائق بھی تم کو فسانے لگے تم نے اچّھاکیا

تم نے سمجھا نہ یہ حرص والے ہی کیونکر سرافراز ہیں

اور کیوں اہلِ دل ہیں ٹھکانے لگے تم نے اچّھا کیا

تم کہ بادِ صبا تھے تم ہی بادِ صرصر میں ڈھلنے لگے

جتنی آنکھیں بھی نم تھیں جلانے لگے تم نے اچّھا کیا

ماجد صدیقی

جون 2, 2008 0

ہم نہ بتلا تے، نہیں، ایسا نہیں

ماجد صدیقی ۔ غزل نمبر 3

آپ ہی نے رازِدل پوچھا نہیں

ہم نہ بتلا تے، نہیں، ایسا نہیں

آپ سے ملنے کا ایسا تھا نشہ

رنگ تھا جیسے کوئی ،اُترا نہیں

سنگ دل تھے اہلِ دنیا بھی بہت

آپ نے بھی ،پیا ر سے دیکھا نہیں

دمبدم تھیں اِک ہمِیں پر یورشیں

تختۂ غیراں کبھی الٹا نہیں

توڑنا، پھر جوڑنا، پھر توڑنا

ہم کھلونوں پر کرم کیا کیا نہیں

ماجد صدیقی

جون 2, 2008 0

آپ نے اپنا وعدہ نبھایا نہیں ہم نہیں بولتے

ماجد صدیقی ۔ غزل نمبر 2

اب کے بھی چاند چہرہ دکھایا نہیں ہم نہیں بولتے

آپ نے اپنا وعدہ نبھایا نہیں ہم نہیں بولتے

وہ کہ پہلے پہل سرخ ہونٹوں پہ تھا مژدۂ عید سا

کوئی مژدہ پھر ایسا سنایا نہیں ہم نہیں بولتے

چاہتوں کا جو سندیس لیکر گیا آپ تک آپ نے

بام سے وہ کبوتر اڑایانہیں ہم نہیں بولتے

مثل شعلوں کے لَو دے اٹھے جو بہ سطحِ نظرآپ نے

پیرہن وہ بدن پر سجایا نہیں ہم نہیں بولتے

وہ کہ مہکار جس کی بہ شدّت ہمیں بھی بلاتی کبھی

پھول انگناں میں ایسا کھلایا نہیں ہم نہیں بولتے

ماجد صدیقی

جون 2, 2008 0

اُتری ہے چاند تک میں ترے پیرہن کی باس

ماجد صدیقی ۔ غزل نمبر 1

آ دیکھ گُل بہ گُل ہے ترے تن بدن کی باس

اُتری ہے چاند تک میں ترے پیرہن کی باس

گل جس طرح رہے ہوں کبھی ہم نشینِخاک

مجھ میں بھی اِس طرح کی ہے تجھ سے ملن کی باس

ہاں ہاں مجھے جلائے جو تیرے فراق میں

ہر رگ میں جاگزیں ہے اُسی اِک اگن کی باس

یوں اب کے اشک یاد میں تیری بہا کیے

بارش برس کے عام کرے جیسے بن کی باس

کھٹکا یہی تو تجھ سے مجھے ابتدا سے تھا

جانا ں!تجھے بھی کھینچ نہ لے جائے دَھن کی باس

ماجد صدیقی

جون 2, 2008 0

اِنتساب

۲۵دسمبر۱۹۶۴ء کے نام

جب دھندلے گمانوں پر

روشن حقیقتوں کے باب کھلے

لازم ہے اِک دَورِ طرب کے بعد مجھے تو بھول بھی جا

میں اِک بار تجھے پھر چاہوں، عہد نیا آغاز کروں

ماجد صدیقی

جون 2, 2008 0

ماجد صدیقی

شاعرِ بے مثال ماجد صدیقی مرحوم ۔ شخصیت اور شاعری

زمرہ

ہم سے لے جائیں تمہیں دُور زمانے والے

وہ لڑکی جو شرمیلے نینوں والی ہے

اِک نظر اے کاش مڑ کر دیکھتے

تم بھی اے کاش! مرے بھاگ جگانے آتے

ٹل جائیں تجھ نگار سے ایسے بھی ہم نہیں

بِن ترے کیا کیا حسیں موسم گزر جانے لگے

ہنس ہنس کر تم ہی نے پُھول کھلانے ہیں

رشک میں اُس شوخ کے اب کی ادائیں شوخ ہیں

مگر اک کٹھن سا سوال ہے تجھے دیکھنا

اور پھر وہ، کہ سنی تم نے زبانی میری

ہاتھوں سے دُور ہونے لگیں اُس جسم کی گولائیاں

یہ ستم مجھ پہ بار بار نہ کر

لب پہ لانے لگی پھر سخن پیار کا، رقص کرتی ہوا

تیر سارے کماں کے چلا دیکھیے

تم بھی جاناں! ذرا مسکرا دیجیے

لیکن جو ہو چکی وہ خطا مان جائیے

نجانے یہ دل جشن کیا کیا مناتا تم آئے تو ہوتے

پُھول کھلیں جب بھی بگھیا میں یاد بہت آتے ہو جاناں

چاند چہرے کا ہوتا اگر ضَونشاں کچھ بگڑنا نہ تھا

آپ سے ہو گیا بھی اگر سامنا ہم نہ کچھ کہہ سکے

میر ے ہونٹوں پہ رقصاں شرر دیکھنا

اُن میں بھی جو سخت تھے وہ دوستوں کے وار تھے

غیر کے روبرو مجھ سے رُوٹھا نہ کر

جاناں! تیر ا برتاؤ بھی جان لیا

دل کا ہر خواب سورج مکھی بن گیا پُھول کھلنے لگے

حسن کے شہ نشیں، لطف کے آسماں دیکھ ایسا نہ کر

بہ بزمِ غیر نہ آتے اگر بُرا کیا تھا

جاناں! قریب آؤگھٹا بھی ہے مے بھی ہے

پھول کیوں شاخ سے ٹوٹ جانے لگا سوچنا چاہیے

پتا پتا موسمِگل بھی بکھر جانے لگا

غیر سارے تمہیں یاد آنے لگے تم نے اچّھا کیا

ہم نہ بتلا تے، نہیں، ایسا نہیں

آپ نے اپنا وعدہ نبھایا نہیں ہم نہیں بولتے

اُتری ہے چاند تک میں ترے پیرہن کی باس

اِنتساب

شاعری